ءۇندىستان ۇكىمەتى اشتىققا قارسى باعدارلاما قابىلدادى. فوتو: Times of India.

ءۇندىستان ۇكىمەتى 16 قازان كۇنى (ازىق-تۇلىك ونىمدەرى كۇنى) «نولدىك اشتىق» دەپ اتالاتىن باعدارلامانى ىسكە قوسادى. «The Times Of India» (ينديا تايمس) باسىلىمىنىڭ حابارلاۋىنشا، بۇل - ءۇندىستان بولاشاعىنىڭ ەڭ باستى پروبلەمالارىنىڭ بىرىنە اينالعان اشارشىلىق پەن ءومىر ءسۇرۋدىڭ قيىنداۋ ماسەلەسىنە قاراتىلعان ۇكىمەتتىك باعدارلاما. وعان قوسا، ءۇندىستان قول قويعان بۇۇ كەلىسىمى – «تۇراقتى دامۋ ماقساتتارى» قاۋلىسىنىڭ تالابىن ورىنداۋ ءۇشىن جاسالعان شارا. بۇل تۋرالى «شينلاڭ» اقپاراتتىق سايتى حابارلاعان ەدى.

اتالعان جوسپاردا سولتۇستىك ۋتتار-پرادەشتەگى گوراحپۋر، ورەگونداعى گرابۋد جانە ماحاراشتراداعى تانا ايماقتارى ءبىرىنشى كەزەكتە قاراستىرىلادى. ءۇندىستان ۇكىمەتى اگرارلىق سەكتورعا بارىنشا كۇش بەرۋگە تىرىسپاق. ءۇندىستاندى جايلاعالى تۇرعان اشتىق پەن ناشار تاماقتانۋ ماسەلەلەرىن شەشۋ ءۇشىن، ءتيىستى اۋىل شارۋاشىلىعى مودەلدەرىن دامىتۋدى جانە كوگالداندىرۋ ادىستەرىن ەنگىزۋدى جوسپارعا الدى. ەلدەگى جولعا قويىلعان «تۇراقتى دامۋ ماقساتتارى» ستراتەگيالىق جوسپارىن 2030 جىلعا دەيىن ورىندالىپ بولۋ ءۇشىن، ەڭ باستىسى ەلدە اشارشىلىق بولماس ءۇشىن، ۇكىمەت باعدارلامانى كوپ سالالاردا ىسكە اسىرماق.

باعدارلامانى قارجىلاندىراتىن جانە عىلىمي-زەرتتەۋگە قولداۋ كورسەتەتىن ۇيىمدار رەتىندە ءۇندىستان اۋىلشارۋاشىلىق زەرتتەۋلەر كەڭەسىن، ءۇندى مەديتسينالىق زەرتتەۋلەر كەڭەسىن، م.س. سۋاميناتان اۋىلشارۋاشىلىق زەرتتەۋ قورى جانە بيوتەحنولوگيا سالاسىن زەرتتەۋگە جاردەمدەسۋ جونىندەگى كوميتەتىن (BIRAC) اتاۋعا بولادى. سونداي-اق، تاماقتانۋ بويىنشا كەڭەس بەرۋ ورتالىقتارى، «نولدىك اشتىق» ترەنينگ باعدارلاماسىن باستاۋعا كومەكتەسەتىن، اگروونەركاسىپتىك جۇيەلەردى ۇيىمداستىرۋ سياقتى ءتيىستى مەملەكەتتىك ورگاندار دا تارتىلاتىن بولادى.

ءۇندىستان ۇكىمەتى ەلدە تاماقتانۋ پروبلەماسىن شەشۋدىڭ باسقا جوسپارلارىن دايىندادى. وندا ماسەلەنى 2020 جىلعا دەيىن شەشۋگە باعىتتالعان جوسپارلار بار. 2015 جىلى ءۇندىستان جانە وزگە ەلدەر بۇۇ بەكىتكەن «تۇراقتى دامۋ ماقساتتارى» باعدارلاماسىن قابىلدادى. بۇل نۇسقاۋلىق بويىنشا، ءۇندىستان ۇكىمەتى ازىق-تۇلىك ءوندىرىسىنىڭ تۇراقتى جۇيەسىن قامتاماسىز ەتۋى ءتيىس، سونىمەن بىرگە ەلدە يكەمدى اگرارلىق مودەلدى ەنگىزۋى كەرەك بولعان.

“The Qazaq Times”