فوتو: iMag.one

رەسەي مەن بەلارۋستىڭ بىرلەسكەن «باتىس-2017» اسكەري وقۋ-جاتتىعۋ جۇمىستارى كەزىندە كا-52 تىك ۇشاعى كورەرمەندەرگە قاراتا وق جاۋدىردى – دەپ حابارلايدى Live news اقپارات كوزى.

سانكت-پەتەربۋرگ قالاسى ماڭىنداعى لۋجسكي سىناق الاڭىندا ءوتىپ جاتقان رەسەي جانە بەلارۋس اسكەرلەرىنىڭ بىرلەسكەن «باتىس-2017» اسكەري وقۋ-جاتتىعۋ جۇمىستارى كەزىندە كا-52 تىك ۇشاعى ابايسىزدا كورەرمەندەرگە قاراتا وق جاۋدىرعان. سالدارىنان ەكى كورەرمەن زارداپ شەككەن. جەرگىلىكتى باق وكىلدەرىنىڭ مالىمەتىنشە، ءتۇرلى دەنە جاراقاتتارىن العان ەكى ادام جۋرناليستەر بولۋى مۇمكىن.

كورەرمەندەرگە وق جاۋدارعان رەسەيلىك كا-52 «الليگاتور» بارلاۋ-جويعىش تىك ۇشاعى - اۋە نىساندارى مەن بروندالعان اسكەري تەحنيكالاردىڭ كوزىن جويۋعا ارنالعان رەسەي قارۋلى كۇشتەرىنىڭ ارسەنالىنداعى سوڭعى ۇلگىدەگى تىك ۇشاقتاردىڭ ءبىرى. «باتىس-2017» اسكەري وقۋ-جاتتىعۋ جۇمىستارى قىركۇيەك ايىنىڭ 14-ءى كۇنى باستالعان. وعان ەكى ەلدەن 12,7 مىڭ سارباز قاتىسۋدا.

ەستەرىڭىزگە سالا كەتەيىك، كەشە ءدال وسى «باتىس-2017» اسكەري وقۋ-جاتتىعۋ جۇمىستارى اياسىندا رەسەي قارۋلى كۇشتەرى كاپۋستين يار سىناق الاڭىنان قازاقستاننىڭ ماقات پوليگنىنا قاراتا «ەسكەندىر-م» زىمىرانىن اتقان بولاتىن.

“The Qazaq Times”