قازاقستاندا التىن قۇيمالارعا سۇرانىس ارتتى

قازاقستاندا التىن قۇيمالاردى ساتۋ باعدارلاماسى باستالعالى بەرى تۇرعىندار سالماعى 10-نان 100 گرامعا دەيىنگى 900 قۇيما ساتىپ العان. بۇل تۋرالى 24.kz حابارلادى.

ۇلتتىق بانك توراعاسى دانيار اقىشەۆ الماتىدا وتكەن ءباسپاسوز ءماسليحاتىندا باعالى مەتالدى قايتا ساتۋدىڭ ەش قيىندىعى جوق ەكەنىن ايتقان. ونىڭ سوزىنشە، بانكتەر ولاردى بىردەن ساتىپ الادى. تاجىريبە كورسەتكەندەي، التىن قۇيمالار – جيناعان اقشانى ينفلياتسيادان قورعاۋدىڭ سەنىمدى قۇرالى.

بۇدان بۇرىن ۇلتتىق بانك ەكىنشى دەڭگەيلى بانكتەر ارقىلى قازاقستاندىقتارعا 17 كيلوگرامم نەمەسە 699 التىن قۇيماسىن ساتقان بولاتىن.

باس بانكيردىڭ سوزىنە سەنسەك، قازاقستانداعى ينفلياتسيا دەڭگەيى ۇلتتىق بانك بەلگىلەگەن 6-8% كولەمىنەن اسپاعان. تاۋارلاردىڭ باعاسى جىل باسىنان بەرى 3,9%-عا قىمباتتاعان. ال وتكەن جىلى بۇل كورسەتكىش 5,4% بولىپتى. قارجى رەتتەۋشىسىنىڭ بولجامى بويىنشا، ينفلياتسيا دەڭگەيى كەلەسى جىلى 5-7% ارالىعىندا ساقتالادى.

سونداي-اق، جۋرناليستەردىڭ سۇراقتارىنا جاۋاپ بەرگەن دانيار اقىشەۆ كريپتوۆاليۋتانى رەتتەۋ ماسەلەسىنە قاتىستى دا ءوز پىكىرىن ءبىلدىردى.

"قازىر ءبىز باقىلاۋشى پوزيتسياسىن ۇستانىپ وتىرمىز. ەگەر سىزدەر بۇل كريپتوۆاليۋتانى قازاقستاندىق نارىقتا ەمەس، ايتالىق، كورشى ءبىر ەلدەن ساتىپ الاتىن بولساڭىز، وندا بۇل ماسەلەنى رەتتەۋ قيىن بولادى", - دەدى دانيار اقىشەۆ.

ايتا كەتەيىك، قازاقستاندا ماۋسىم ايىنان باستاپ تازارتىلعان التىندى ساتىپ الۋ باعدارلاماسى ىسكە قوسىلدى. ەكىنشى دەڭگەيلى بانكتەردەن 10, 20, 50 جانە 100 گرامدىق التىن قۇيمالارىن ساتىپ الۋعا بولادى.

“The Qazaq Times”