پەنتاگون ءسۇريا بۇلىكشىلەرىنە قارۋ-جاراقتى قازاقستان، ۋكراينا جانە گرۋزيادان العان – دەپ مالىمدەدى ۇيىمداسقان قىلمىس جانە جەمقورلىقتى زەرتتەۋ ورتالىعى (OCCRP) مەن بالقان جۋرناليستىك زەرتتەۋلەر بىرلەستىگى (BIRN).

جوعارىدا اتالعان ۇيىمداردىڭ زەرتتەۋلەرى بويىنشا، پەنتاگون ءتۇرلى حالىقارالىق دەڭگەيدەگى دەلدالدار ارقىلى جالپى قۇنى 2,2 ميلليارد دوللار كولەمىندەگى قارۋ-جاراقتى «يسلام مەملەكتى» ۇيىمىمەن سوعىسىپ جاتقان ءسۇريا بۇلىكشىلەرىنە جىبەرگەن. پەنتاگون بۇل قارۋ-جاراقتاردى ەكى ۇيىم ارقىلى ساتىپ العان. ولار ارنايى وپەراتسيالار باسقارماسى (SOCOM) مەن شتاب پاتەرى نيۋ-دجەرسي شتاتىندا ورنالاسقان Picatinny Arsenal وندىرىس جانە عىلىمي-زەرتتەۋلەر ورتالىعى.

OCCRP مەن BIRN ورتالىقتارىنىڭ وسى ىسكە بايلانىستى مىڭداعان قۇجاتتاردى زەرتتەۋ ناتيجەسىندە پەنتاگوننىڭ 2017 جىلدىڭ مامىر ايىنا دەيىن قازاقستان، ۋكراينا، گرۋزيا، اۋعانستان، بولگاريا، چەحيا، پولشا، بوسنيا جانە گەرتسەگوۆينا، سەربيا ەلدەرىنەن جالپى كولەمى 238,5 ميلليون دوللاردى قۇرايتىن قارۋ-جاراق ساتىپ العاندىعى انىقتالعان.

“The Qazaq Times”