اقش كاسپەرسكي ونىمدەرىنە شەكتەۋ قويدى

اقش ىشكى قاۋىپسىزدىك دەپارتامەنتى  فەدەرالدى ورگاندارعا ۇكىمەتتىك كومپيۋتەرلەردە ورناتىلعان رەسەيلىك «كاسپەرسكي زەرتحاناسى» جەلىلىك قاۋىپسىزدىك كومپانياسىنىڭ ونىمدەرىن تاۋىپ، ونى الىپ تاستاۋدى بۇيىردى. ولاردىڭ ايتۋىنشا، رەسەيلىك بارلاۋ اگەنتتىگى «Kaspersky Software»-ءدى پايدالانىپ، قۇراما شتاتتىڭ قاۋىپسىزدىك جۇيەسىنە شابۋىل جاساۋى مۇمكىن. بۇل تۋرالى «The Wall Street Journal» ءوزىنىڭ رەسمي سايتىندا جازدى.

بۇل اقش بارلاۋ ۇيىمدارىنىڭ «رەسەي 2016 جىلعى پرەزيدەنت سايلاۋ ىسىنە كەدەرگى كەلتىردى» دەگەن ايىپتاۋلارىنىڭ جاڭا ءبىر مازمۇنى دەۋگە بولادى. اقش بارلاۋ اگەنتتىكتەرىنىڭ قاراۋىنشا،  رەسەي جاق كومپيۋتەرلىك جۇيەلەرگە شابۋىل جاساۋ ارقىلى دەموكراتيالىق ۇلتتىق كوميتەتتەن (Democratic National Committee) اقپارات جانە باسقا قۇرالداردى ۇرلاعان. سول ارقىلى دونالد ترامپتىڭ داۋىس بەرۋ ىسىنە ارالاسىپ، ونىڭ سايلاۋداعى باسىمدىعىنا اسەر ەتكەن دەپ سانايدى.

ۇلتتىق قاۋىپسىزدىكتى قامتاماسىز ەتۋ دەپارتامەنتىنىڭ بۇل شەشىمى كاسپەرسكيدىڭ ونىمدەرىنە اۋىر سوققى بولماق. شىن مانىندە رەسەيدىڭ حالىقارالىق كومپيۋتەر ونىمدەرى بيزنەسىنە شىعا العان كاسىپورىندارى وتە از. كاسپەرسكي بولسا وسى ازداعان كاسىپورىنداردىڭ بىرەۋى. ءبىر كەزدەرى بۇل كومپانيا ۇكىمەتتىك كەلىسىمشارتتاردى جەڭىپ الىپ، ونەركاسىپتىك باقىلاۋ جۇيەلەرىنە قاۋىپسىزدىك ونىمدەرىن ساتۋمەن اقش نارىعىنداعى ءوز ۇلەسىن كەڭەيتكەن بولاتىن.

“The Qazaq Times”