АҚШ Барлау агенттері Касперский өнімдерін тыңшылықпен айналысады деп айыптады. Фото: Russia Now.

АҚШ ішкі қауіпсіздік департаменті  федералды органдарға үкіметтік компьютерлерде орнатылған ресейлік «Касперский Зертханасы» желілік қауіпсіздік компаниясының өнімдерін тауып, оны алып тастауды бұйырды. Олардың айтуынша, Ресейлік барлау агенттігі «Kaspersky Software»-ді пайдаланып, Құрама Штаттың қауіпсіздік жүйесіне шабуыл жасауы мүмкін. Бұл туралы «The Wall Street Journal» өзінің ресми сайтында жазды.

Бұл АҚШ барлау ұйымдарының «Ресей 2016 жылғы президент сайлау ісіне кедергі келтірді» деген айыптауларының жаңа бір мазмұны деуге болады. АҚШ барлау агенттіктерінің қарауынша,  Ресей жақ компьютерлік жүйелерге шабуыл жасау арқылы Демократиялық Ұлттық Комитеттен (Democratic National Committee) ақпарат және басқа құралдарды ұрлаған. Сол арқылы Дональд Трамптың дауыс беру ісіне араласып, оның сайлаудағы басымдығына әсер еткен деп санайды.

Ұлттық қауіпсіздікті қамтамасыз ету департаментінің бұл шешімі Касперскийдің өнімдеріне ауыр соққы болмақ. Шын мәнінде Ресейдің халықаралық компьютер өнімдері бизнесіне шыға алған кәсіпорындары өте аз. Касперский болса осы аздаған кәсіпорындардың біреуі. Бір кездері бұл компания үкіметтік келісімшарттарды жеңіп алып, өнеркәсіптік бақылау жүйелеріне қауіпсіздік өнімдерін сатумен АҚШ нарығындағы өз үлесін кеңейткен болатын.

“The Qazaq Times”