يىۇ سامميتىنە قاتىسۋشى باسشىلار مەن قوناقتار. فتو: akorda.kz.

اپتا سوڭىندا بولىپ وتكەن «ەكسپو-2017» الەمدىك كورمەسىنىڭ جابىلۋ قارساڭىندا جانە يسلام ىنتىماقتاستىق ۇيىمىنا مۇشە ەلدەرىنىڭ عىلىم جانە تەحنولوگيا جونىندەگى ءبىرىنشى ءسامميتى بارىسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ سالتاناتتى جينالىسقا كەلگەن بىرقاتار ەلدەر مەن حالىقارالىق ۇيىمداردىڭ باسشىلارىمەن كەزدەستى. بۇل تۋرالى اقوردانىڭ رەسمي سايتى حابارلاعان بولاتىن.

قر پرەزيدەنتى قابىلداعان باسشىلار اراسىندا ۆەنەسۋەلا پرەزيدەنتى نيكولاس مادۋرو (قازاقستانعا العاش رەت ساپارلاي كەلۋى), يران پرەزيدەنتى حاسان رۋحاني،  گۆينەيا رەسپۋبليكاسىنىڭ پرەزيدەنتى الفا كوندە، يندونەزيا رەسپۋبليكاسىنىڭ ۆيتسە-پرەزيدەنتى يۋسۋف كاللا جانە اۋعانستان يسلام رەسپۋبليكاسىنىڭ پرەزيدەنتى موحامماد اشراپ عاني قاتارلى باسشىلار بار. سونىمەن بىرگە، يسلام دامۋ بانكىنىڭ پرەزيدەنتى باندار بەن مۇحامماد حاندجارمەن جانە يىۇ-نىڭ باس حاتشىسى يۋسەف بين احماد ءال-وسەيميندى دە قابىلدادى.

بۇل رەتكى سامميتتە 57 يسلام ەلىنىڭ عالىمدارى مەن باسشىلارى كەلىپ، عىلىم-تەحنولوگيانى دامىتۋ ىستەرى تۋراسىندا تالقىلار وتكىزدى. سونىمەن بىرگە ەلگە ساپارلاي كەلگەن مەملەكەت باسشىلارىمەن ەكىجاقتى ساۋدا-ەكونوميكالىق، قاۋىپسىزدىك، قاتىناس-تاسىمال ىستەرىندەگى ىنتىماقتاستىقتار دا جەكە-جەكە ءسوز بولدى. يران يسلام رەسپۋبليكاسى، يندونەزيا باسشىلارىمەن كەزدەسۋدە تاراپتاردىڭ وسىعان دەيىن جۇرگىزگەن ءتۇرلى ىنتىماقتاستىعىن ودان سايىن تەرەڭدەتۋ ماسەلەلەرى قوزعالدى. ال، ۆەنەسۋەلا باسشىسى نيكولاس مادۋرو ەلىمىزگە العاش رەت ساپارلاي كەلىپ، قازاقستانمەن قارىم-قاتىناستى بارىنشا نىعايتۋعا نيەتتى ەكەنىن ءبىلدىرىپ كەتتى.

“The Qazaq Times”