اقش-تىڭ اۋعانستانداعى اسكەرلەرى. فوتو: Scout.com.

6 قىركۇيەك كۇنى پەنتاگوننىڭ لاۋازىمدى تۇلعاسى اقش-تىڭ اۋعانستانعا 3500 اسكەري جىبەرەتىنى جونىندەگى مالىمەتتى تولىقتاي راستادى. سونىمەن اقش-تىڭ اۋعانستاندا 14 مىڭ 500 جاۋىنگەرى بار. اۋعانستانداعى اسكەري كۇشتەردىڭ سانىن ۇلعايتۋ دونالد ترامپتىڭ وڭتۇستىك ازيا جانە ورتا شىعىستاعى ساياساتىنىڭ ماڭىزدى ءبىر بولەگى سانالادى. بۇل تۋرالى «شينحۋا» اگەنتتىگى حابارلاعان بولاتىن.  

ال، Reuters اگەنتتىگىنىڭ 6 قىركۇيەكتەگى حابارىندا، اتىن ايتقىسى كەلمەگەن بىرنەشە اقش لاۋازىمدىلارىنىڭ سوزىنە سىلتەمە بەرە وتىرىپ، قورعانىس ءمينيسترى جەيمس ماتيسس، بىرلەسكەن شتاب توراعاسى جوزەف دانفورد، مەملەكەتتىك حاتشى رەكس تيللەرسون جانە ۇلتتىق بارلاۋ جونىندەگى ديرەكتور دەن كوتتس پارلامەنتتىڭ كەيبىر مۇشەلەرىمەن باس قوسىپ، اۋعانستانداعى ترامپتىڭ جاڭا ستراتەگياسىنىڭ نەگىزگى ەلەمەنتتەرى تۋرالى كەڭەس وتكىزگەنى تۋرالى حابارلاعان ەدى.

ABC ارناسىنا بەرگەن مالىمەتىندە دە رەكس تيللەرسون اۋعانستانعا جىبەرىلەتىن اسكەرلەر سانى 3500 ەكەنىن راستادى. الايدا، پەنتاگوننىڭ قىزمەتكەرلەرى بۇل ىستەن بەيحابار ەكەنىن ايتادى.

2001 جىلى 11 قىركۇيەكتە بولعان وقيعادان كەيىن، اقش ۇكىمەتى ۋساما بەن لادەن جەتەكشىلىگىندەگى «ءال-كايدا» ۇيىمىنا قارسى اسكەري ارەكەتكە شەشىم قابىلدادى. العاشقى ادىمدا اقش-تىڭ 100 مىڭنان استام اسكەرى اۋعانستانعا كىردى. الايدا، بۇل قادامنان كەيىن اقش ۇكىمەتىنە ىشكى-سىرتقى قىسىمدار ارتىپ كەتتى. كوپتەگەن ادامدار ۇكىمەتكە بۇل قىمبات اسكەري ارەكەتتى توقتاتۋعا ۇسىنىس تاستادى.

2014 جىلدىڭ سوڭىندا، اقش-تىڭ جەتەكشىلىگىندەگى سولتۇستىك اتلانتيكالىق شارت ۇيىمى اۋعانستانداعى حالىقارالىق قاۋىپسىزدىك كومەك كۇشى جەدەل ميسسياسىن اياقتادى. اۋعانستاننىڭ قاۋىپسىزدىك كۇشتەرى جاتتىعۋلارى مەن قۇرال-جابدىقتارمەن قولداۋعا ويىستى. باستاپقى جوسپارعا سايكەس، اۋعانستانداعى اقش اسكەرىنىڭ سانى 2016 جىلدىڭ سوڭىنا قاراي 1000 ادامعا دەيىن قىسقارتىلاتىن بولعان. بىراق بۇل قىسقارتۋدى اقش-تىڭ بۇرىنعى پرەزيدەنتى بىرنەشە رەت باسەڭدەتىپ كەلدى.

«رەيتەر» اگەنتتىگى حابارىنا سۇيەنسەك، اۋعانستان سوعىسىندا اقش-تىڭ 2300-دەن استام جاۋىنگەرى قازا تاپقان جانە 17 مىڭنان استام ادامى جاراقات العان ەكەن.

“The Qazaq Times”