وڭتۇستىك كورەيا قارتتارى. فوتو: 凤凰新闻/

وڭتۇستىك كورەياداعى باق-تىڭ حابارلاۋىنشا، مەملەكەت تۇرعىندارىنا جۇرگىزىلگەن ساناقتىڭ جاڭا ناتيجەسى بويىنشا 65 جاستان اسقان قارتتار حالىق سانىنىڭ 14 پايىزىن ۇستايتىنى انىقتالعان. بۇل كورەيا قوعامىنىڭ «قارتتىق قوعامعا» اياق باسقانىنان دەرەك بەرەدى. بۇل تۋرالى «شينلاڭ» اقپاراتتىق سايتى جازدى.

وڭتۇستىك كورەيانىڭ قاۋىپسىزدىك قىزمەتى 3 قىركۇيەكتە جاريالاعان مالىمەتىنە سۇيەنسەك، تامىز ايىنىڭ سوڭىنا دەيىن وڭتۇستىك كورەيانىڭ حالىق سانى 51 ملن 753 مىڭ 820 ادام بولىپ، 65 جاستان اسقان قارتتاردىڭ سانى 14 پايىزدى يەلەگەن.

بۇۇ حالىق سانىن انىقتاۋ كوميتەتىنىڭ كورسەتكەن ولشەمى بويىنشا 65 جاستان اسقان قارتتاردىڭ ۇلەس سالماعى ەل حالقىنىڭ 7 پايىزىن قۇراسا «قارتتانا باستاعان قوعام»، 14 پايىزىن يەلەسە «قارتتانعان قوعام»، 20 پايىزىن قۇرايتىن بولسا «ايرىقشا قارتتانعان قوعام» رەتىندە قارالادى.

وڭتۇستىك كورەياداعى جوللانام-دو تۇرعىندارى اراسىندا 65 جاستان اسقان حالىق سانى 21,4% بولعان. بۇعان قوسا 8 پروۆينتسياسىندا حالىق سانىنىڭ 14 پايىزدان 20 پايىزعا دەيىنگى ۇلەس سالماعىن 65 جاستان اسقان كورەيالىق قارتتار قۇراعان. جانە تاعى 8 پروۆينتسيادا قارتتار سالماعى 7 پايىزدان 14 پايىزعا دەيىن يەلەگەن. تەكسەرۋ ناتيجەسىنە سايكەس، قازىرگى تاڭدا وڭتۇستىك كورەيادا حالىق سانىندا قارتتار ۇلەس سالماعى 7 پايىزعا جەتپەيتىن پروۆينتسيا اتىمەن جوق بولىپ شىقتى.

بۇل كورسەتكىش ءبىر ەسەپتەن كورەيا حالقىنىڭ قارتتانۋىن كورسەتكەنىمەن، ەندى ءبىر جاعىنان سول ەلدىڭ ۇزاق جاساۋ كورسەتكىشىنىڭ جوعارى ەكەنىن انىقتايدى. وسىدان بۇرىن سايتىمىزدا كورسەتكەن "ۇزاق جاساۋدىڭ قۇپياسىن تاپقان ەلدەر" اراسىندا، دامىعان مەديتسينا جانە جوعارى دارەجەلى ازىقتانۋ ساپاسىنىڭ ناتيجەسىندە وڭتۇستىك كورەيا تۇرعىندارىنىڭ ۇزاق جاساۋى الەمنىڭ الدىنعى قاتارىندا ەكەنىن ايتقان ەدىك.

“The Qazaq Times”