فوتو: Vesti.ru

تەحاس گۋبەرناتورى گرەگ ەببوتتىڭ ايتۋىنشا، "حارۆي" داۋىلىنىڭ سالدارىن جويۋ ءۇشىن 180 ميلليارد دوللار قاجەت. بۇل تۋرالى BBC اگەنتتىگىنە سىلتەمە جاساپ، RNS سايتى حابارلادى.

گرەگ ەببوتتتىڭ سوزىنشە، حارۆي داۋىلىنان كەلگەن شىعىن 2005 جىلى نيۋ-ورلەانعا "كاترينا" داۋىلى كەلتىرگەن شىعىننان دا كوپ.

ال توتەنشە جاعدايلاردى باسقارۋ جونىندەگى فەدەرالدىق اگەنتتىكتىڭ باسشىسى بروك لونگ بولسا سۋ تاسقىنىنان زارداپ شەككەن تەحاس تۇرعىندارىنا "شىعىندار تولىق فەدەرالدى بيۋدجەت ەسەبىنەن تولەنبەيتىنىن" ايتتى.

سونداي-اق، تەلەراديو كەشەنى تەحاس پەن  لۋيزياناداعى اعىن سۋلار تولىق سىڭبەستەن، ەلدى مەكەندەردى قايتا قالپىنا كەلتىرۋ جۇمىستارى باستالىپ كەتكەنىن حابارلادى.

اقش پرەزيدەنتىنىڭ ءباسپاسوز حاتشىسى سارا ساندەرس دونالد ترامپتىڭ جەكە قاراجاتتارىنان تەحاس شتاتىنا 1 ملن دوللار بولەتىنىن حابارلاعان. سونىمەن قاتار، سارا ساندەرس دونالد ترامپتىڭ داۋىلدىڭ ەپيتسەنترى بولعان تەحاس پەن لۋيزياناعا ەكىنشى رەت بارۋ جوسپارى بار ەكەنىن ايتقان.

حارۆي داۋىلىنان قازا تاپقان ادامداردىڭ سانى 39-عا جەتتى.

ايتا كەتەيىك، بۇعان دەيىن كەيبىر ساراپشىلار تەحاس شتاتىنداعى حارۆي داۋىلىنان كەلگەن شىعىن 100 ملرد دوللار شاماسىندا بولۋى مۇمكىن دەپ بولجاعان. شىعىن كولەمىنىڭ مۇنداي بولاتىنى تۋرالى العاش پىكىر بىلدىرگەن - Imperial Capital بانكىنىڭ ساقتاندىرۋشى ساراپشىسى دەۆيد حەيۆەنس. ال Enki Research كومپانياسىنىڭ ساراپشىسى چاكا ۋوتسونا شىعىن 30 ملرد دوللار بولادى دەپ ەسەپتەگەن ەدى.

“The Qazaq Times”