فوتو: EPA

ۆەنەسۋەلانىڭ جاڭادان قۇرىلعان اسسامبلەياسىنىڭ مۇشەلەرى مەملەكەت باسشىسى نيكولاس مادۋروعا قارسىلاس وپپوزيتسيونەرلەردى "حالىق جاۋى" دەپ تانۋ تۋرالى ۇسىنىس ءبىلدىردى. بۇل تۋرالى BBC اقپاراتتىق اگەنتتىگى جازدى. 

اسسامبلەيا مۇشەلەرى وپپوزيتسيا وكىلدەرىن اقش-تىڭ ۆەنەسۋەلاعا قارسى سالعان سانكتسيالارىن قولداعانى ءۇشىن ايىپتاپ وتىر. ولاردىڭ كەشەگى رەسمي باس قوسۋى كەزىندە وپپوزيتسيا تاراپىنداعىلاردى "حالىق جاۋى" دەپ تانىپ، ولاردى قۋدالاۋ جونىندەگى ۇسىنىس ءبىراۋىزدان قابىلداندى. دەگەنمەن، ناقتى جازاعا تارتىلاتىن وپپوزيتسيا مۇشەلەرىنىڭ اتتارى اتالعان جوق.

وسىدان بۇرىن ۆەنەسۋەلا پرەزيدەنتى نيكولاس مادۋرونىڭ وپپوزيتسيا تاراپىنىڭ باسقارۋىندا بولعان پارلامەنتتى تاراتىپ، ورنىنا ءوز جاقتاستارىنان قۇرىلعان اسسامبلەيا قىزمەتىن بەكىتۋى حالىقتىڭ جاپپاي كوتەرىلىسكە شىعۋىنا الىپ كەلگەن بولاتىن. اقش ۇكىمەتى پرەزيدەنتتىڭ بۇل ارەكەتىن دەموكراتياعا قايشى دەپ تاۋىپ، اۋەلى مەملەكەت باسشىسىنا، كەيىننەن بۇكىل مەملەكەتكە قارسى بىرقاتار ەكونوميكالىق سانكتسيالار ەنگىزدى. نيكولاس مادۋرو بۇل شەكتەۋ شارالارى ۆەنەسۋەلانىڭ ونسىز دا تۇراقسىز ەكونوميكاسىنا قارسى جاسالعان ادىلەتسىزدىك دەپ ەسەپتەيدى.

“The Qazaq Times”