موسۋل ماڭىنان تابىلعان ادام دەنەلەرى. فوتو: Naqeeb Lucknow.

يراك ۇكىمەت ارمياسىنىڭ اسكەرلەرى 25 تامىز كۇنى موسۋل قالاسىنا جاقىن ماڭنان ەكى شوعىرلى قابىرلەردى تاپقانىن جاريا ەتتى. بۇل قابىرلەردەن ەكسترەميستەر سىناق ءۇشىن ولتىرگەن 500-دەن استام ادامنىڭ ءمايىتى تابىلعان. بۇل تۋرالى «شينلاڭ» اقپاراتتىق سايتى حابارلادى.

يراكتىڭ بىرلەسكەن وپەراتسيالىق قولباسشىلىعى جاساعان مالىمدەمەسىندە، 25 تامىزدا ۇكىمەت اسكەرلەرى موسۋلدىڭ باتىس ماڭىنان بايقاعان قابىرلەردە 470 ادامنىڭ ءبۇتىن دەنەسى مەن 30-دان اسا بولشەكتەلگەن دەنە مۇشەلەرى تابىلعان. تەكسەرە كەلە بۇل «يسلام مەملەكەتى» سودىرلارى ولتىرگەن جانە تاجىريبە جاساعان ادامدارىنىڭ مايىتتەرى» دەپ انىقتالعان.

موسۋل قالاسى - يراكتىڭ ەكىنشى ۇلكەن قالاسى. ورتالىق قالا باعداتتان 400 شاقىرىم قاشىقتىققا ورنالاسقان. وندا يراقتاعى ەكىنشى ۇلكەن تۇرمە سانالاتىن بەدز تۇرمەسى ورنالاسقان. 2014 جىلى ماۋسىم ايىندا موسۋل قالاسى «يسلام مەملەكەتى» لاڭكەستىك ۇيىمى جاعىنان باسىپ الىندى. سودان باستاپ بۇل قالا يراكتاعى اتالعان تەررورلىق ۇيىمنىڭ باس-شتاب پاتەرىنە اينالدى. 2016 جىلدىڭ قازان ايىنان باستاپ يراك ۇكىمەتى اقش اۋە كۇشتەرىنىڭ قولداۋىنا سۇيەنە وتىرىپ، موسۋلدى قايتارىپ الۋ شايقاسىن باستادى. بيىلعى جىلدىڭ 10 شىلدەسى كۇنى يراك پرەمەر-ءمينيسترى ءال-ابادي موسۋلدىڭ ازات بولعانىن رەسمي تۇردە جاريا ەتتى.

“The Qazaq Times”