فوتو: APF

كەنيادا وتكەن پرەزيدەنتتىك سايلاۋدىڭ قورىتىندىسىنا نارازى رايلا ودينگا باستاعان وپپوزيتسيانى قولداعان حالىق پەن قاۋىپسىزدىك قىزمەتى اراسىندا بولعان قاقتىعىستار ناتيجەسىندە 16 ادام قازا تاپتى. بۇل تۋرالى APF اقپاراتتىق اگەنتتىگى جازدى. 

ەل استاناسى نايروبيدە 3 ملن-عا جۋىق حالىق تۇراتىنىنا قاراماستان، قالا كوشەلەرى بوساپ قالدى دەپ حابارلايدى اقپاراتتىق اگەنتتىك تىلشىلەرى. وتكەن اپتادا بولعان سايلاۋدان كەيىن، ەل بيلىگى جەرگىلىكتى حالىقتى قالىپتى تىرشىلىككە ورالۋعا شاقىرعانىمەن، رايلا ودينگا ءوز قولداۋشىلارىنا جولداعان ۇندەۋىندە: ء"بىز ءالى اياقتاعان جوقپىز. ەشتەڭەگە قاراماستان، ءبىز بەرىلمەيمىز! كەلەسى قادامىمىز قالاي بولاتىندىعى تۋرالى مەنىڭ حابارىمدى كۇتىڭىزدەر", - دەي كەلە، حالىقتى پوليتسيا قولىنان جان تاپسىرعان 16 بەيبىت تۇرعىننىڭ قازاسىنا ازا تۇتىپ، ۇيدە وتىرۋعا، دۇيسەنبى كۇنى جۇمىسقا شىقپاۋعا شاقىردى.

ەستەرىڭىزگە سالا كەتەيىك، جۇما كۇنى ورتالىق سايلاۋ كومميسسياسى ۋحۋرۋ كەنياتانى كەنيا پرەزيدەنتى دەپ جايالاعاننان كەيىن، ونىڭ قارسىلاسى، مەملەكەت باسشىلىعىنا ۇمىتكەر بولعان رايلا ودينگا "داۋىس بەرۋشىلەردى تىركەيتىن ەلەكتروندى جۇيەگە حاكەرلىك شابۋىل جاسالىپ، ناتيجە وزگەرتىلگەن" دەپ نارازىلىق ءبىلدىرىپ، ءوز قولداۋشىلارىمەن بىرگە شەرۋلەر ۇيىمداستىردى.

بۇۇ، ەۋرووداق رايلا ودينگانى بەيبىت تۇرعىنداردىڭ ومىرىنە قاۋىپ توندىرمەس ءۇشىن، ولاردى سابىرعا شاقىرىپ، ءوز قۇقىقتارىن قورعاۋدا زاڭدى جولداردى پايدالانۋعا كەڭەس بەردى. 2013 جىلى سايلاۋ قورىتىندىلارىن مويىنداماي، سوتقا جۇگىنگەن رايلا ودينگا جەڭىلىس تاپقان بولاتىن. سوندىقتان وسى جولى ول زاڭعا نەگىزدەلگەن شەشۋ جولدارىن قاراستىرىپ وتىرعان جوق.

رايلا ودينگانىڭ ەكونوميكالىق ءوسىم مەن مەملەكەتتىڭ گۇلدەنۋىنە اكەلەتىن رەفورمالار تۋرالى باعدارلاماسىنا ارقا سۇيەپ، سەنىم ارتاتىندار - نەگىزىنەن، حالىقتىڭ ەڭ كەدەي بولىگى.

كەنياداعى سايلاۋدان كەيىنگى كوتەرىلىستەر مەن قاقتىعىستار ءبىرىنشى رەت بولىپ وتىرعان جوق. 2007 جىلى مۆاي كيۆاكي مەن رايلا ودينگا اراسىنداعى ساياسي تارتىستىڭ سوڭى 1 100 ادامنىڭ ولىمىنە اكەلىپ،  600 مىڭ ادامنىڭ تۇرعىلىقتى مەكەن-جايىن اۋىستىرۋىنا ءماجبۇر ەتكەن قايعىلى جاعدايعا ۇلاسقان بولاتىن.

“The Qazaq Times”