فوتو: inder.mn

ەل ەكونوميكاسى وتە قيىن جاعدايدا. ال باسقارۋشى پارتيا مەن مينيسترلەر كابينەتى دەمالىپ جاتىر - دەپ مالىمدەدى مونعوليا پرەزيدەنتى حالمااگين باتتۋلگا MNB تەلەارناسىنا بەرگەن سۇحباتىندا.

حالمااگين باتتۋلگا مونعوليا پرەزيدەنتى بولىپ سايلانعانىنا 30 كۇن تولۋىنا وراي MNB ارناسىنىڭ «تساگ ۇە – ۇزەل بودول» باعدارلاماسىنا سۇحبات بەردى. باعدارلاما بارىسىنادا باتتۋلگا مونعوليانىڭ قازىرگى جاعدايى جايىندا: «شىندىعىن ايتقاندا ەلدىڭ قازىرگى جاعدايى ءماز ەمەس. مونعوليا ەكونوميكاسى وتە قيىن جاعدايدا تۇر. وسىعان قاراماستان باسقارۋشى پارتيا مەن مينيسترلەر كابينەتى دەمالىپ جاتىر. ەل ەكونوميكاسى تىعىرىققا تىرەلىپ تۇرعاندا باسقارۋشى پارتيا فراكتسيالارى ءبىر-بىرىمەن «سوعىسىپ» ءجۇر» - دەدى.

بۇدان بولەك ول: «مونعوليا حالقى ادىلدىكتى قالايدى. بىراق ول ءۇشىن باسقارۋشى بيلىكتى جەمقورلاردان تازارتۋ كەرەك. نەگە ەلدىڭ بارلىعى بيلىك باسىندا بولعىسى كەلەدى؟ ويتكەنى ولار ساياساتقا كەلۋ ارقىلى بايىعىسى كەلەدى. مەن وسى باسسىزدىقتى توقتاتۋ ءۇشىن پرەزيدەنت بولدىم» - دەدى.

ەستەرىڭىزگە سالايىق، حالمااگين باتتۋلگا بۇعان دەيىن شەتەلدەردە وفشورلى شوتتارى بار ازاماتتارعا بارلىق قارجىنى مونعولياعا قايتىپ الىپ كەلۋگە 49 كۇن ۋاقىت بەرەتىندىگىن ايتقان بولاتىن.

“The Qazaq Times”