اۋعانستاندا تاليبان تەررورلىق ۇيىمىنىڭ كوشباسشىلارىنىڭ ءبىرى احماد شاح ءولتىرىلدى، دەپ حابارلايدى Oxu.az سايتى «سينحۋا» اگەنتتىگىنە سىلتەمە جاساپ.

اۋعانستاننىڭ دجاۋزدجان پروۆينتسياسىنىڭ پوليتسيا باسشىسى راحماتۋللا تۇركىستانيدىڭ مالىمەتىنشە، تامىزدىڭ 7-ءسى كۇنى اۋعانستان قاۋىپسىزدىك قىزمەتى دجاۋزدجان پروۆينتسياسىنا قاراستى فايزاباد اۋدانىندا ورنالاسقان تاليبان قوزعالىسىنىڭ جاسىرىن بازاسىنا شابۋىل جاساعان. اسكەري وپەراتسيا بارىسىندا تاليبان قوزعالىسىنىڭ «كۆەتتا شۋرى» جوعارى كەڭەسىنىڭ مۇشەسى احماد شاح پەن ونىڭ ءتورت بىردەي كومەكشىسى وققا ۇشقان.

قازىرگى تاڭدا دجاۋزدجان پروۆينتسياسىندا اۋعانستان اسكەريلەرى مەن تاليبان قوزعالىسى سودىرلارىنىڭ اراسىندا كەسكىلەسكەن سوعىس جۇرۋدە. مارديان اۋدانىندا جەرگىلىكتى پوليتسيا مەن اۋعانستان اسكەرى بىرىگىپ تاليبان سودىرلانىنا اۋىر سوققىلار جاساعان. بىراق وسىنى پايدالانىپ دجازۋدجان اۋماعىندا «يسلام مەملەكەتى» لاڭكەستىك ۇيىمىنىڭ سودىرلارى دا باس كوتەرە باستاعان.

“The Qazaq Times”