ساۋد ارابياسىندا "قاندى ءولىم" قۇرباندارى كوبەيدى

حالىقارالىق Amnesty International ۇيىمى ساۋد ارابياسى بيلىگىن، ەلدەگى كەزەكتى 14 ادام ءولىم جازاسىنا كەسىلگەننەن كەيىن، "قاندى ءولىم" اتالىپ كەتكەن پروتسەستى توقتاتۋعا شاقىردى. بۇل تۋرالى ءال-جازيرا "Al-Jazeera" اقپاراتتىق اگەنتتىگى جازادى.

ۇيىمنىڭ كەلتىرگەن مالىمەتى بويىنشا، اعىمداعى جىلى ساۋد ارابياسىندا 66 ادام ءولىم جازاسىنا تارتىلعان. وتكەن جەكسەنبىدە ەر-ريادتاعى مامانداندىرىلعان قىلمىستىق سوت تاعى 15 ادامدى ءدال وسىنداي جازاعا كەسكەن.  Amnesty International  قىزمەتكەرلەرى ۇستالعانداردىڭ كوبى بيلىككە قارسى شەرۋلەر مەن ەرەۋىلدەرگە قاتىسقانىن جەتكىزدى. قازىر ولارعا يراننىڭ تىڭشىسى بولعان، جارىلعىش زاتتاردى قولدان جاساعان، قۇقىق قورعاۋ ورگانى قىزمەتكەرلەرىنە كۇش كورسەتكەن، ۇرلىق جاساعان، ت.ب. ايىپتار تاعىلىپ وتىر.

Amnesty International -دىڭ تاياۋ شىعىس ءۇشىن جاۋاپتى قىزمەتكەرى Samah Hadid-ءتىڭ ايتۋىنشا، ساۋد ارابياسى بيلىگى وزدەرىنە قارسى شىققان جات وي مەن يدەولوگيا وكىلدەرىن، ساياسي قارسىلاستارىنىڭ كوزىن قۇرتۋ ءۇشىن ءولىم جازاسىن قارۋ ەسەبىندە پايدالانىپ وتىر. قۇقىق قورعاۋ ۇيىمىنىڭ ۇسىنعان پىكىرىنشە، قازىر جازاعا كەسىلگەن ازاماتتاردى ولىمنەن اراشالاپ تۇرعان تەك ەل پاتشاسىنىڭ قولى عانا. "ەگەر مەملەكەت باسشىسى جالعان سوت پروتسەستەرىنىڭ ناتيجەسى بولىپ تابىلاتىن شەشىمدەردىڭ كۇشىن جويسا، بۇل  ادىلدىك ورناتۋ جولىنداعى ەڭ ماڭىزدى قادام بولار ەدى", - دەپ ەسەپتەيدى Amnesty International وكىلدەرى . ساۋد ارابياسىنىڭ بيلىگى سوڭعى 3,5 اپتا ىشىندە 26 ادامنىڭ جازاسىن ورىنداپ ۇلگەرگەن. بۇل شامامەن، مەملەكەتتە كۇنىنە ءبىر ءولىم بولاتىنىن كورسەتەدى.

بريتاندىق قۇقىق قورعاۋ ۇيىمى Reprieve بۇگىنگى سارسەنبىگە دەيىن ءولىم جازاسى ۇكىمىنىڭ كۇشىن جويۋ ءۇشىن پەتيتسيا دايىنداپ، 32 مىڭ قول جينادى. وسىدان بۇرىن اتالعان ۇيىم Munir Adam ەسىمدى جانارىنان ايىرىلعان ازاماتتىڭ بيلىككە قارسى حالىقتىق قارسىلىق وقيعاسىنا قاتىسقانى ءۇشىن تۇتقىندالىپ، قۇقىق قورعاۋ ورگانى قىزمەتكەرلەرىنىڭ كورسەتكەن ازابىنان ەستۋ قابىلەتىنەن ايىرىلعانىن جازىپ، دابىل قاققان بولاتىن. قولعا تۇسكەندەر ءوز ايىپتارىن مويىنداعانعا دەيىن، ولاردى قيناپ، ازاپتاۋ وقيعالارى كوپتەپ كەزدەسەتىنىن، ال بۇل ازاماتتىق قۇقىقتاردى مەملەكەتتىڭ "رۇقساتىمەن" بۇزۋشىلىق ەكەندىگىن ايتقان ۇيىم الەمدىك قاۋىمداستىقتىڭ قولداۋىن كۇتەدى.

“The Qazaq Times”