اقش جاڭا سانكتسيالارىنىڭ ءبىر ۇشى قىتايعا دا تيمەك

بۇگىن تاڭەرتەڭ اقش مەملەكەتتىك دەپارتامەنتىنىڭ جوعارى لاۋازىمدىلارىنىڭ ءبىرى مەملەكەتتىڭ جاقىن ارادا قىتايلىق تۇلعالارعا قاراتا جاڭا سانكتسيا جاريالايتىنىن ايتتى. سەبەبى ولار بۇۇ-نىڭ سولتۇستىك كورەياعا باعىتتاعان سانكتسياسىن بۇزعان. بۇل تۋرالى «The Wall Street Journal» باسىلىمى حابارلاپ وتىر.

اتالعان سانكتسيا تۋرالى اقش مەملەكەتتىك دەپارتامەنتىنىڭ شىعىس ازيا ىستەرى جونىندەگى كومەكشىسىنىڭ مىندەتىن اتقارۋشى سيۋزان تورنتون اقش كونگرەسى وكىلدەرىنىڭ كىشى وتىرىسىندا ءمالىم ەتتى. ونىڭ مالىمەتىندە اقش قازىنا دەپارتامەنتى كوپ ۇزاماي كيم جوڭ ۋن (كيم چەن ىن/Kim Jong Un) رەجيمىنە قولداۋ تانىتقان قىتايلىق تۇلعالارعا سانكتسيا سالماق. سەبەبى، اقش ۇكىمەتى سانكتسيا قاراۋىنداعى قىتايلىق جەكە تۇلعالار مەن كاسىپورىندار بۇۇ-نىڭ كحدر-عا باعىتتاعان قارارىن بۇزعان دەپ قارايدى. سونىمەن بىرگە، بۇل تۇلعالارعا قىتاي ۇكىمەتى ناقتى شارا قولدانباي وتىرعانىن العا تارتتى.

امەريكا قۇراما شتاتتارى 4 شىلدەدەگى سولتۇستىك كورەيانىڭ بالليستيكالىق زىمىران سىناعى ءساتتى اياقتالعاننان كەيىن، بۇۇ قاۋىپسىزدىك كەڭەسىنىڭ سولتۇستىك كورەيا قارسى جاڭا سانكتسيالار بەكىتۋگە شاقىردى. سەبەبى، سول رەتكى سىناق ارقىلى سولتۇستىك كورەيا ءوزىنىڭ يادرولىق قارۋىن اقش تەرريتورياسىنا، قالا بەردى الياسكاعا جەتكىزە الاتىنىن دالەلدەدى.

ال، قىتايلىق كومپانيالار مەن جەكە تۇلعالاردىڭ سانكتسيا قاراۋىنا ىلىنەتىنى دە تۇسىنىكتى جاعداي. وسىعان دەيىن اقش قازىنا دەپارتامەنتى جاريالاعان مالىمەتتە قىتايدىڭ كەيبىر بانكتەرى مەن كومپانيالارى سولتۇستىك كورەيا قارۋ-جاراق تاسىمالداۋشى، ساتۋشى كومپانيالارىنىڭ اقشا جىمقىرۋ جانە قارۋ تاسىمالداۋ ىستەرىنە كومەك كورسەتكەن دەپ ايىپتاعان بولاتىن.

“The Qazaq Times”