گەرمانيانىڭ ەكىۇشتى ساياساتى نەمەسە ەۋرووداق رەسەيگە جاڭا سانكتسيالار سالا ما؟

گەرمانيا ەۋرووداقتى قىرىمداعى Siemens تۋربينالارىنا قاتىستى بولعان داۋعا بايلانىستى رەسەيگە قارسى جاڭا سانكتسيالار ەنگىزۋگە شاقىردى. سونىمەن قاتار وسى سارسەنبىدە ەۋروكوميسسيا اقش-تىڭ رەسەيگە سالعان سانكتسيالارىنا قارسى ارەكەت جوسپارىن تالقىلايتىن جيىن وتكىزگەلى وتىر.

وسى تۇستا BBC جۋرناليستەرىنىڭ ەۋرووداقتىڭ ۇستانىپ وتىرعان ساياساتىنا قاتىستى تاۋەلسىز ساراپشىلاردان جيناعان پىكىرىن نازارلارىڭىزعا ۇسىنامىز.

نەمىس ءجۋرناليسى الەكساندر رار:

«ەۋرووداقتىڭ اقش سانكتسيالارىمەن كەلىسپەيتىن سەبەبى، ونىڭ ەنگىزىلۋ سەبەبى مەن ساياسي استارىنىڭ گەرمانياعا دا، وزگە ەۋروپا مەملەكەتتەرىنە دە قاتىسى جوق. اقش رەسەيگە قارسى قاتاڭ شارالاردى وزدەرىندە وتكەن سايلاۋ قورىتىندىسىن وزگەرتىپ، ەلدىڭ ىشكى ىسىنە قول سۇقتى دەگەن ايىپقا ەرىپ، قابىلداپ وتىر. ەكىنشى تاراپتان، باتىس ەلدەرى رەسەيگە ەركىندىك بەرىپ، سانكتسيالاردان تولىقتاي باس تارتۋدى ءوز بەدەلدەرىنە سىن كورەدى. سوندىقتان گەرمانيا جاڭا جەڭىل سانكتسيالار ۇسىنىپ وتىر. بۇل شەكتەۋلەر رەسەي ەكونوميكاسىنا قاتتى كەرى اسەرىن تيگىزبەيدى، ويتكەنى ەۋروپانىڭ گاز سەكتورىنداعى ارىپتەستىكتى توقتاتپاۋى، ولاردىڭ ماسكەۋمەن ەكونوميكالىق بايلانىستاردى ءبىرجولا ۇزۋگە مۇددەلى ەمەستىكتەرىن بىلدىرەدى».

تاۋەلسىز ساراپشى يۋري فەدوروۆ:

«ەۋروپانىڭ رەسەيگە قارسى ەنگىزىپ وتىرعان جاڭا شەكتەۋلەرىنە نەگىز بار. داۋعا
اينالعان Siemens تۋربينالارى قىرىمعا مۇلدە كىرگىزىلمەۋ كەرەك بولاتىن. ال
اقش-تىڭ ارەكەتىن قولداماۋىنا كەلسەك، جاڭا قاتاڭداتىلعان ەكونوميكالىق
سانكتسيالار رەسەيگە عانا ەمەس، ءۇشىنشى ەلدەردىڭ، ونىڭ ىشىندە ەۋروپالىق بىرقاتار كومپانيالارعا اسەر ەتكەلى تۇر».

Schneider Group كومپانياسىنىڭ نەگىزىن سالۋشى ۋلف شنايدەر:

«مەن ەكونوميكالىق سانكتسيالاردى مۇلدە قولدامايمىن. دەگەنمەن گەرمانيا
ەكۇشتى ارەكەتىن تۇسىنەتىن سياقتىمىن. اقش جاڭا سانكتسيالارى «سولتۇستىك
اعىس – 2» (سەۆەرنىي پوتوك - 2) جوباسىن توقتاتۋعا باعىتتالعان بولۋى مۇمكىن.
ەگەر سولاي بولسا، وندا بۇل جەردە ەۋروپا دا ءبىراز زارداپ شەگەدى».

“The Qazaq Times”