يندونەزيادا ەسىرتكى ساۋدالاعانداردى ولتىرۋگە رۇقسات بەرىلدى

يندونەزيانىڭ پرەزيدەنتى يوكو ۆيدودو مەملەكەتتە ءورشىپ تۇرعان ەسىرتكى ساۋداسىن اۋىزدىقتاۋ ءۇشىن، پوليتسياعا ناشانى ءوندىرۋشى، تاسىمالداۋشى، تاراتۋشىلاردى ولتىرۋگە بۇيرىق بەردى. بۇل تۋرالى ءال-جازيرا (Al-Jazeera) جازادى.

مەملەكەت باسشىسى الەمدىك قاۋىمداستىقتىڭ ءبىراز نارازىلىعىن تۋدىرعان بۇل شەشىمدى ءفيليپپيننىڭ ەسىرتكىگە قارسى كۇرەس ۇلگىسىن پايدالانىپ، قابىلداپ وتىرعانىن جەتكىزدى.

اتاپ ءوتۋ كەرەك، ءفيليپپيننىڭ پرەزيدەنتى رودريگو دۋتەرتە بيلىك باسىنا كەلگەن ساتىندە: "ادولف گيتلەر 3 ملن ەۆرەيدى ءولتىردى. ءبىزدىڭ ەلىمىزدە 3 ملن ناشاقور بار. مەن ولار ءۇشىن "ادولف گيتلەر" بولىپ،  مەملەكەتتى تازارتامىن" دەپ مالىمدەگەن بولاتىن. نەبارى  4 ايدىڭ ىشىندە فيليپپيندە ەسىرتكى پايدالانعاندار مەن ساۋدالاعانداردى سوت شەشىمىنسىز-اق، ۇستالعان جەرىندە ولتىرەتىن ء"ولىم ەسكادروندارى" قۇرىلعان بولاتىن.

يوكو ۆيدودو جاڭا شەشىم تۋرالى: ء"بىزدىڭ ەلىمىزگە كەلىپ، ەسىرتكى تاسىمالدايتىن شەتەلدىك ازاماتتار كوپ. ولاردى قولعا ءتۇسىرۋ قيىن، سوندىقتان ۇستالعان جەردە بارلىعىن اتۋ كەرەك", -دەپ پىكىر ءبىلدىردى.

يندونەزيادا ەسىرتكى تۋرالى زاڭدار ونسىزدا قاتال. وسىدان بۇرىن مەملەكەت باسشىسى ءومىر بويى اباقتىعا جابىلعان بىرقاتار شەتەلدىك ازاماتتاردى ءولىم جازاسىنا كەسىپ، باسى "داۋعا" قالعان ەدى. ءولتىرۋ تۋرالى بۇيرىققا ىلىنگەندەردىڭ قاتارىندا ءوز ازاماتتارى بولعان اۆستراليا، فرانتسيا، برازيليا مەملەكەتتەرى يندونەزيانىڭ ەلشىلىكتەرىنە قاتاڭ سوگىس جاريالاپ، مۇنداي شەشىمدەر دەموكراتيالىق پرينتسيپتەرگە قايشى دەپ دابىل قاققان.

بارلىق قارسىلىقتارعا قاراماستان، يوكو ۆۋدودو شەشىمىن وزگەرتەتىن ەمەس.

“The Qazaq Times”