فوتو: ينفورم-UA

«قازكونتەنت» اق National Digital History پورتالىنىڭ شەتەلدە تۇراتىن ەتنيكالىق قازاقتار تۋرالى «قيىرداعى قازاقتار» اتتى 8 سەريالى دەرەكتى ءفيلمىنىڭ ءتۇسىرىلىمى باستالدى. دەرەكتى فيلم 16 جەلتوقسان – قر تاۋەلسىزدىك كۇنى قارساڭىندا دايىن بولادى، دەپ حابارلايدى قازاقستان- 2050 سايتى.

«حالقىمىزدىڭ تاعدىرى تاريحتىڭ قيىن-قىستاۋ كەزەڭدەرىن قامتيدى. حح عاسىردىڭ ءبىرىنشى جارتىسىندا بولعان قايعىلى وقيعالار اتا-بابالارىمىزدىڭ الدىنا قيىن تاڭداۋ قويدى. وسى سەبەپتەن بۇگىنگى كۇنى وتانىمىزدان تىس جەرلەردە ميلليونداعان قازاقتار تۇرىپ جاتىر. الايدا، اراقاشىقتىققا قاراماستان، ولار بابالارىنان قالعان سالت-داستۇرلەر مەن ادەت-عۇرىپتاردى ساقتاي الدى. بۇگىن ءبىز «قيىرداعى قازاقتار» اتتى وتە ماڭىزدى جوبانىڭ تۇساۋىن كەسىپ وتىرمىز»، - دەدى مينيستر قر اقپارات جانە كوممۋنيكاتسيالار ءمينيسترى داۋرەن اباەۆ ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا.

ونىڭ سوزىنشە، مينيسترلىك جانە National Digital History پورتالى وسى جوبانى قوعامدى، ازاماتتارىمىزدى شەتەلدەگى قازاقتاردىڭ ومىرىمەن، تۇرمىسىمەن جانە تاعدىرىمەن تانىستىرۋ ماقساتىندا ۇلت جوسپارى اياسىندا ىسكە اسىرىپ وتىر.

«سەريال 8 بولىمنەن تۇرادى، تۇسىرىلىمدەر 8 ەلدە وتپەك. ءفيلمدى مەملەكەتتىك تىلدە ءتۇسىرىپ، كەيىن ونى ورىس جانە اعىلشىن تىلدەرىنە اۋدارۋدى جوسپارلاپ وتىرمىز. كورەرمەندەر وسى ءفيلمدى تاۋەلسىزدىك كۇنى قارساڭىندا كورە الادى دەگەن ۇمىتتەمىز»، - دەپ اتاپ وتتى د. اباەۆ.

ال «قازكونتەنت» اق توراعاسى ەۆگەني كوچەتوۆ ءتۇسىرىلىمنىڭ وسى ايدا باستالاتىنى تۋرالى ايتتى.

“The Qazaq Times”