ازەربايجان حالىقارالىق بانكى.

18 شىلدە كۇنى باكۋ ءازىربايجان حالىقارالىق بانكى قارىزىن قايتا قۇرىلىمداۋعا قاتىستى داۋىس بەرۋ ناتيجەلەرىن جاريالادى. داۋىس ناتيجەسى بويىنشا كرەديتورلاردىڭ 94 پايىزى ازەربايجان تاراپىنىڭ قارىزى قايتا قۇرىلىمداۋ تۋرالى ۇسىنىسىنا داۋىس بەرگەن.

ال بانككە قارجى اۋدارعان ءىرى كرەديتورلاردىڭ ءبىرى قازاقستاننىڭ بىرىڭعاي جيناقتاۋشى زەينەتاقى قورى قارىزدى قايتارۋ بويىنشا نومينالدى سومماسىن جوعالتپاي ازەربايجاننىڭ تاۋەلسىز وبليگاتسيالارىنا اۋىستىرۋ ارقىلى  2032 جىلعا دەيىن جابۋ نۇسقاسىن تاڭداعان.

ياعني ازەربايجان حالىقارالىق بانكىنىنىڭ بجزق الدىنداعى قارىز مىندەتتەرى يرلاندىق قور بيرجاسىندا ساۋدالاناتىن جاڭا تاۋەلسىز وبليگاتسيالار شىعارۋ جولى ارقىلى تولىعىمەن ءازىربايجان ۇكىمەتىنە وتەدى.

ايتا كەتەيىك، 2017 جىلدىڭ مامىرىندا جوعارىدا اتالعان ازەربايجاننىڭ پروبلەمالى بانكى سىرتقى قارىز مىندەتتەرى بويىنشا تولەمنىڭ توقتاتىلعانىن جانە قارىزداردىڭ قايتا قۇرىلىمدالاتىنىن مالىمدەگەن. ال مامىردىڭ 11-ءى كۇنى ءاحب نيۋ-يورك سوتىنا وزدەرىن بانكروت دەپ تانۋ تۋرالى ءوتىنىش جىبەرگەن. وسىلايشا بانك سىرتقى قارىزىن قايتا قۇرىلىمداۋ ءۇشىن مەملەكەتتەن كومەك الماق.

ەسكە سالايىق، 2014 جىلدىڭ قازانىندا بجزق زەينەاتقى قارجىسىنىڭ 250 ملن دوللارىنا احب-نىڭ بورىشتىق باعالى قاعازدارى ساتىپ الىنعان. وسىعان بايلانىستى قازاقستاندا پروبلەمالى بانكتىڭ باعالى قاعازدارىنا جۇمسالعان قارجىعا قاتىستى الاڭداۋشىلىق تۋىنداعان بولاتىن.

ال ۇلتتىق بانكتىڭ بۇرىنعى توراعاسى قايرات كەلىمبەتوۆ ازەربايجاننىڭ حالىقارالىق بانكىنە سالىنعان قازاقستاندىقتاردىڭ زەينەتاقى قارجىسى سول ەلدىڭ ۇكىمەتتىك قارىزى رەتىندە كونۆەرتاتسيالانۋى مۇمكىن ەكەنىن ايتقان.

“The Qazaq Times”