رەسەي جاپون دەلەگاتسياسىن كۋريل ارالدارىنا كىرگىزبەي قويدى

رەسەي بيلىگى نەمۋرو قالاسىنىڭ مەرى سيۋنسۋكە حاسەگاۆۋ باستاعان جاپون دەلەگاتسياسىنا وڭتۇستىك كۋريل ارالدارىنا كىرۋگە تىيىم سالدى. قالا باسشىسى بۇل تۋرالى جوسپارلانعان ءىسساپارىنان ءبىر كۇن بۇرىن عانا  بىلگەن دەپ جازادى The Japan Times.

باسىلىمنىڭ مالىمەتىنشە، جاپونيانىڭ ۋكراينا ماسەلەسىنە قاتىستى رەسەيگە سالعان سانكتسياسى، جاپون دەلەگاتسياسىنىڭ ارالدارعا كىرۋىنە تىيىم سالۋعا باستى سەبەپ بولعان. دەگەنمەن رەسەيدىڭ سىرتقى ىستەر مينيسترلىگى بۇل جونىندە ءالى ارنايى مالىمدەمە جاساعان جوق.

اتاپ ءوتۋ كەرەك، كۋريل ارالدارىنا قاتىستى تەرريتوريالدى داۋ رەسەي مەن جاپونيانىڭ اراسىندا ءالى دە شەشىمىن تابا الماي كەلەدى. جاپونيا وڭتۇستىكتە ورنالاسقان يتۋرۋپ، كۋناشير، شيكوتان جانە  حابوماي ارالدارىن وزدەرىنىڭ تاريحي تيەسىلى جەرى سانايدى. ال رەسەي  كەڭەس وداعى بۇل اۋماقتى جاپونيانىڭ ەكىنشى دۇنيەجۇزىلىك سوعىستاعى جەڭىلىسىنەن كەيىن زاڭدى تۇردە العان دەگەن تۇجىرىمدى العا تارتادى.

“The Qazaq Times”