اقش تايۆانعا قارۋ-جاراق ساتىپ، قىتايدىڭ قيتىعىنا تيمەك

ءبىر كۇن بۇرىن اقش ۇكىمەتى جاريالاعان حاباردا، كونگرەستىڭ ماقۇلداۋىمەن اقش تايۆانعا قۇنى 1 ملرد 420 ملن اقش دوللارى تۇراتىن قارۋ-جاراق ساتىپ بەرەتىنىن ايتتى. بۇل ترامپ قۇراما شتات پرەزيدەنتى بولعالى بەرى تايۆانعا قارۋ-جاراق ساتۋدى العاش رەت جۇزەگە اسىرۋى بولىپ سانالادى. بۇل تۋرالى “The Wall Street Journal” باسىلىمى حابارلاعان بولاتىن.

اقش جوعارى لاۋازىمدىلارىنىڭ ءبىرىنىڭ ايتۋىنشا تايۆانعا ساتىپ بەرەتىن قارۋ-جاراقتاردىڭ ىشىندە رادار، راكەتالار مەن تورپەدو قاتارلى قورعانىستاعى ماڭىزدى قۇرال-جابدىقتاردان تارتىپ، كەمەلدى قورعانىس جۇيەسىنىڭ ساندىق تەحنولوگياسى دا بار.

كونگرەسس قارارىندا ايتىلۋىنشا، كونستيتۋتسيا بويىنشا اقش-تىڭ تايۆانعا قارۋ-جاراق ساتۋعا تولىق قۇقىعى بار. سوڭعى رەت تايۆانعا قارۋ ساتۋ 2015 جىلى وباما ۇكىمەتى جاعىنان جۇزەگە اسىرىلعان. الايدا، ءار جولى اقش تايۆانعا قارۋ-جاراق ساتىپ بەرگەن سايىن، قىتاي تاراپى كۇشتى نارازىلىق تانىتىپ كەلەدى. رەسمي بەيجىڭ تايۆاندى «ۇلكەن قىتايدىڭ» ءبىر بولەگى دەپ مالىمدەۋدەن جازبايدى. ال، اقش-تاعى قىتاي باس ەلشىلىگى بۇل تۋرالى جۋرناليستەردىڭ سۇراعىنا جاۋاپ بەرۋدەن باس تارتتى.

اقش مەملەكەتتىك دەپارتامەنتىنىڭ وكىلى كەشەگى بەرگەن مالىمەتىندە: «بەيسەنبى كۇنى كونگرەسس شىعارعان شەشىم اقش-قىتاي كەلىسىمگە كەلگەن «ۇلكەن قىتاي» ساياساتىنا قايشى كەلمەيدى. ونىڭ ۇستىنە اقش ۇزاق جىلداردان بەرى «ءبىر قىتاي» ساياساتىنا قايشىلىق جاساپ كورگەن جوق»، – دەدى. ول تاعى: «ترامپ ۇكىمەتىنىڭ تايۆانعا قارۋ-جاراق ساتۋى ونىڭ دەربەستىگىن قولداعاندىق ەمەس، قايتا ءوزىن ءوزى قورعاۋ قابلەتىن كۇشەيتۋىنە بەرگەن كومەگى»، – دەدى.

اقش كونگرەسىنىڭ تايۆانعا قارۋ-جاراق ساتۋ ىسىنە قابىلداعان شەشىمنىڭ كۇشىنە يە بولۋىنا 30 كۇن ۋاقىت بار. ەگەر، ەكى پارتيانى قامتىعان سەگىز سەناتور ۇكىمەتكە راتيفيكاتسيالاۋ تۋرالى حات جولداسا، شەشىمنىڭ كۇشىنەن قالۋى دا مۇمكىن.

“The Qazaq Times”