اق ءۇي: امەريكا ەلدەرى ءۇشىن قىتايمەن ىنتىماقتاستىق جاساۋ ۇزاق بولاشاققا ءتيىمسىز

اق ءۇي بەيسەنبى كۇنى كەشتە جازباشا مالىمدەمە جاساپ، سالۆادور مەن تايۋان (تايۆان) قاتىناسىنىڭ ۇزىلۋىنە بايلانىستى الاڭداۋشىلىق ءبىلدىردى جانە  بەيجىڭدى باتىس جارتى شار ەلدەرىنىڭ ساياساتىنا ارالاستى دەپ ايىپتادى.  

بىرنەشە كۇن بۇرىن ورتالىق امەريكا مەملەكەتى سالۆادور تايۋانمەن بولعان بىرنەشە ون جىلدىق تاريحى بار ديپلوماتيالىق قارىم-قاتىناسىن ءۇزىپ، بەيجىڭمەن ىنتىماقتاستىق ورناتاتىنىن بىلدىرگەن ەدى.

اق ءۇيدىڭ جازباشا مالىمدەمەسىندە: «بايلانىستى ءۇزۋ تۋرالى شەشىم، تەك سالۆادورعا عانا ەمەس، بۇكىل امەريكاداعى ەكونوميكا، دەنساۋلىق ساقتاۋ جانە قاۋىپسىزدىك تاقىرىپتارىنا اسەر ەتەدى. قۇراما شتات جاعى سالۆادور شەشىمىنەن كەيىن قىتايدىڭ باتىس جارتى شارداعى ءبىر مەملەكەتتىڭ ساياساتىنا جاساعان ىقپالىنا الاڭداۋشىلىق بىلدىرەدى. سوندىقتان دا، اقش سالۆادورمەن بولعان قارىم-قاتىناستى قايتا قارايتىن بولادى»، – دەلىنگەن.

اق ءۇي تارابى قىتايمەن ىنتىماقتاستىق ورناتۋ، امەريكا قۇرلىعىنداعى ەلدەر ءۇشىن، قىسقا مەرزىمدىك ەكونوميكالىق وسىمگە پايدالى بولعانىمەن، ۇزاق بولاشاقتان دۇرىس شەشىم ەمەس دەپ قارايدى. اتالعان مالىمدەمەدە: «كەيبىر ەلدەر قىتايمەن قارىم-قاتىناس ورناتىپ نەمەسە بايلانىستى كەڭەيتىپ، مەملەكەتتىك ينۆەستيتسيالاردى تارتۋ ارقىلى قىسقا مەرزىمدى ەكونوميكالىق ءوسىم مەن ينفراقۇرىلىمدى دامىتادى، بىراق ۇزاق مەرزىمدى پەرسپەكتيۆادا بۇل پايداسىز بولۋى مۇمكىن»، – دەپ جازىلعان.

مالىمدەمەدە جانە: «الەمنىڭ كوپتەگەن ەلدەرى قىتاي تارابىنان بەرىلگەن ەكونوميكالىق جەڭىلدىكتەر تەڭ سەرىكتەستىك قۇرۋ ەمەس ەكەنىن، كەرىسىنشە ەلدىڭ قىتايعا تاۋەلدىلىگىن ارتتىراتىن جانە قىتاي مارتەبەسىن نىعايتۋ ەكەنىن تۇسىنە باستادى»، – دەلىنگەن.

اق ءۇي مالىمدەمەسى ارقىلى قىتايدىڭ توعىسپالى قاتىناستاردا تۇراقسىزدىق تۋدىرۋىنا جانە باتىس جارتى شار ەلدەرىنىڭ ساياساتىنا ارالاسۋىنا قارسى تۇراتىنىن ءبىلدىردى.

“The Qazaq Times”