مونعولياداعى پرەزيدەنت سايلاۋىندا وپپوزيتسيالىق پارتيا وكىلى الدا كەلەدى.

كەشە مونعوليادا پرەزيدەنت سايلاۋى بولىپ ءوتتى. سايلاۋعا ەل حالقىنىڭ 66,5 پايىزى قاتىسقان. ازىرگە سايلاۋعا قاتىسقان ءۇش كانديداتتىڭ ىشىندە كوش باسىندا دەموكراتيالىق پارتيا وكىلى حالتمااگين باتتۋلگا كەلە جاتىر.

بىراق سايلاۋعا قاتىسقان ءۇش ۇمىتكەردە ءتيىستى 50 پايىز داۋىس جيناي الماعان. سول سەبەپتى الداعى ەكى اپتا ىشىندە سايلاۋدىڭ ەكىنشى تۋرى ءوتۋى ءتيىس.

حالتمااگين باتتۋلگامەن بىرگە ەكىنشى اينالىمعا كىم شىعاتىنى ازىرگە بەلگىسىز. ول قازىر بيلىك باسىندا وتىرعان مونعوليا حالىقتىق پارتياسىنىڭ وكىلى ميەەگومبىن ەنحبولد نەمەسە مونعوليا حالىقتىق-رەۆوليۋتسيالىق پارتياسىنىڭ وكىلى ساينحۋگين گانبااتار بولۋى مۇمكىن.

ەستەرىڭىزگە سالايىق ماۋسىمنىڭ 26 كۇنى مونعوليا حالقى ءوز تاريحىندا جەتىنشى رەت پرەزيدەنت سايلاۋىن وتكىزگەن بولاتىن. سايلاۋ كەزىندە ەل اۋماعىندا 1983 سايلاۋ بولىمشەلەرى تاڭعى ساعات 7:00-دەن تۇنگى ساعات 22:00-گە دەيىن جۇمىس جاساعان. سايلاۋ كوميسسياسىنىڭ جۇمىسىن الەمنىڭ 37 ەلىنەن كەلگەن 123 باقىلاۋشى قاداعالاعان.

“The Qazaq Times”