قىرعىزستاندا پرەزيدەنت سايلاۋىنىڭ كۇنى بەلگىلەندى

قىرعىزستاندا پرەزيدەنت سايلاۋىنىڭ ۋاقىتى بەلگىلىندى دەپ حابارلايدى ريا نوۆوستي اقپارات اگەنتتىگى.

قىرعىزستاننىڭ قازىرگى باسشىسى المازبەك اتامباەۆتىڭ  پرەزيدەنتتىك مەرزىمى وسى جىلدىڭ جەلتوقسان ايىنىڭ 1 كۇنى ءبىتۋى ءتيىس. وسىعان بايلانىستى قىرعىزدىڭ «اتا-مەكەن» وپپوزيتسيالىق پارتياسى سايلاۋدىڭ ەكىنشى كەزەڭى مەن يناۋگۋراتسيانى ۋاقىتىندا وتكىزۋ ءۇشىن پرەزيدەنت سايلاۋىن ەرتەرەك وتكىزۋ كەرەكتىگىن سۇراعان. بۇل ۇسىنىستى قىرعىزستان پارلامەنتىدە قولداعان.

ال بۇگىن ەل پرەزيدەنتى المازبەك اتامباەۆ قىرعىزستان قارۋلى كۇشتەرىنىڭ قۇرىلعان كۇنىنە وراي وتكىزىلگەن سالتاناتتى شارادا سويلەگەن سوزىندە «ءتورت ايدان سوڭ، ياعني 15 قازان كۇنى قىرعىزستان حالقى ءوزىنىڭ جاڭا پرەزيدەنتىن سايلايتىن بولادى.» دەپ مالىمدەمە جاساعان.

بۇدان بولەك ول ءوزىنىڭ 6 جىل پرەزيدەنت بولىپ تۇرعاندا اتقارعان قىزمەتتەرىنە قىسقاشا توقتالىپ. وسى 6 جىل ىشىندە قىرعىزستان حالقى ءوز جولىن تاپتى دەگەن.

“The Qazaq Times”