امەريكا بالالارىنىڭ اكە-شەشەلەرىنە «ەسكەرتپەسى»

مەنىڭ قولىم وتە كىشكەنە، مەيلى قاي ۋاقىتتا بولسىن سىزدەر مەنىڭ مۇلتىكسىز ءىس ىستەۋىمدى تالاپ ەتپەڭىز. مەنىڭ اياقتارىم دا كىشكەنتاي، وزدەرىڭىزبەن ىلەسىپ وتىرسىن دەسەڭىزدەر، اقىرىن جۇرىڭىزدەر.

مەن سىزدەر سياقتى كوپتى كورگەن جوقپىن. سىزدەر مەنى ورىنسىز شەكتەي بەرمەي، ءوز بەتىمشە باقىلاۋ جاساپ، وي تۇيۋىمە مۇمكىندىك بەرىڭىزدەر.

اكە مەن بالا. فوتو: fonstola.ru

ءۇي جۇمىسى تاۋسىلىپ بەرمەيدى. ال، مەنىڭ بالالىق شاعىم از عانا. سىزدەر ماعان ارا-تۇرا ۋاقىت ءبولىپ، ومىرلىك ءمانى بار قىزىقتى وقيعالاردى اڭگىمەلەپ تۇرىڭىزدار. مەنى انشەيىن ءبىر كوڭىل كوتەرەتىن ويىنشىق رەتىندە قاراماڭىزدار.

مەنىڭ سەزىمدەرىم وتە نازىك. سىزدەر كۇنى بويى قازىمىرلانىپ ۇرسا بەرمەي، ماعان سەزىمتالدىقپەن مامىلە جاساڭىزدار. وزدەرىڭىزگە قانداي پوزيتسيا ۇستانساڭىزدار، ماعان دا سونداي تۇسىنىكپەن قاراڭىزدار.

اقش جالاۋىن كوتەرگەن بالالار. فوتو: world.fedpress.ru.

مەن ءتاڭىردىڭ سىزدەرگە سىيلاعان ەرەكشە تارتۋىنىڭ ءبىرىمىن. مەنى ايالاي بىلىڭىزدەر. باۋىرلارىڭىزعا باسىپ، ەركەلەتكەن كەزدەردە، ءىس-ارەكەتتەرىم جونىندە اقىل ايتىڭىزدار. نەگە سۇيەنىپ ءومىر سۇرەتىنىم تۋرالى ءجون سىلتەڭىزدەر، ادامدارمەن يبالى، مادەنيەتتى بولۋدىڭ جولىن ۇيرەتىڭىزدەر.

مەن سىزدەردىڭ كوڭىل ءبولىپ، جىگەرلەندىرىپ وتىرعاندارىڭىزعا مۇقتاجبىن. ۇنەمى سىن ايتىپ كوڭىلىمدى تۇسىرە بەرمەڭىزدەر. ەستەرىڭىزدە بولسىن، سىزدەر مەنىڭ ءوزىمدى ەمەس، قاتە جىبەرگەن ىستەرىمدى عانا سىناۋلارىڭىزعا بولادى.

سوسىن، ماعان ەركىندىك بەرىپ تۇرىڭىزدار. وزىمە ءتيىستى شارۋالاردى ءوزىم ىستەيتىن بولايىن. قاتەلىككە بوي الدىرۋىما، ساتسىزدىككە ۇشىراۋىما دا تۇسىنىستىكپەن قاراڭىزدار. ءسويتىپ ءجۇرىپ دۇرىس جولدى تاۋىپ الامىن.

ءبىر سارىندى جۇمىستى ماعان قايتا-قايتا ىستەتە بەرمەڭىزدەر. جۇمىس ىستەۋدىڭ وڭاي ەمەس ەكەنىن مەن دە بىلەمىن. الايدا، اعا، اپكەلەرىممەن سالىستىرۋعا ۇرىنباڭىزدار.

امەريكالىق بالالار اتا-اناسىمەن. فوتو: youtube.com

اپتانىڭ سوڭعى كۇنىن مەنىمەن بىرگە وتكىزۋدەن قاشقاقتاماڭىزدار. اكە-شەشەلەرى كىشكەنتاي بالالارىنىڭ قىزىعىنا قانداي كەنەلگىسى كەلسە، بالالارى دا اتا-اناسىنىڭ مەيىرىنە سونداي بولەنگىسى، العىسى كەلەدى.

اۋدارعان: شولپان

«The Qazaq Times»