ترامپ العاشقى مەملەكەتتىك ساپارىن مەككە، يەرۋساليم جانە ۆاتيكاننان باستاماق

اقش پرەزيدەنتى دونالد ترامپ جۇما كۇنى ءوزىنىڭ قىزمەتكە كىرىسكەننەن بەرگى العاشقى رەسمي ساپارىنا شىعادى. بۇل ساپارى تاياۋ شىعىس بەيبىت پروتسەسىنە جانە بىرلەسكەن ەۋروپالىق وداقتاستارىنىڭ لاڭكەستىككە قارسى كۇرەسىنە جاردەمدەسۋ ماقساتىنا باعىتتالادى دەپ حابارلاندى. بىراق ول قۇراما شتات ءدوپ كەلىپ وتىرعان ىشكى ساياسي ماسەلەلەرگە قولدى ءبىر-اق سىلتەپ كەتكەلى تۇر. بۇل تۋرالى “The Wall Street Journal” باسىلىمى حابارلاعان بولاتىن.

ترامپتىڭ بۇل رەتكى ساپارى توعىز كۇنگە جالعاسپاق. ساۋد ارابياسى مەن يزرايلدە دە ارناۋلى ساپاردا بولادى. ۆاتيكاندا بولىپ ريم پاپاسىمەن دە جولىقپاق. سونداي-اق، ەو-نىڭ بىرنەشە ماڭىزدى تۇلعالارى مەن ناتو-نىڭ بريۋسسەلدەگى باسشىلارىنا كەزدەسۋدى جوسپارلاپ وتىر.

اقش مەملەكەتتىك ىستەر حاتشىسى رەكس تيللەرسون كەشە جاساعان مالىمدەمەسىندە: «پرەزيدەنت ترامپتىڭ بۇل رەتكى ساپارى مىنانى بىلدىرەدى – امەريكا قۇراما شتاتى ساياسي ارەناعا عالام دامۋىنىڭ سىندارلى كوشباسشىسى رەتىندە قايتا ورالدى»، – دەدى. ول جانە: «پرەزيدەنت ترامپ وسى ساپارىندا ۇلتتىق كوشباسشى رەتىندە سوعىس جانە بەيبىتشىلىك ماسەلەلەرىن شەشۋگە تىرىسادى»، – دەدى.

سونىمەن، پرەزيدەنتتىككە كەلمەي تۇرىپ-اق، الەمدى دۇبىرگە سالعان اقش پرەزيدەنتى العاش رەت شەتەلدەگى رەسمي ساپارىن بۇگىن باستاعالى تۇر. بۇل ترامپ ۇكىمەتىنىڭ سىرتقى ساياساتىندا ازىرگە دەيىن انىق بولماعان كەيبىر ىستەردى اشىپ كورسەتۋمەن بىرگە، الەمدىك اقپارات كەڭىستىگىنە ءدۇبىرلى وقيعالاردى الىپ كەلۋ بەك مۇمكىن. ءتىپتى، بۇل ساپار بولاشاق بىرنەشە جىلدا الەمدىك ماڭىزدى وقيعالاردىڭ مۇرىندىعى بولارى انىق.

"The Qazaq Times"