فوتو: scoop.it

مەكسيكالىق جۋرناليست حاۆەر ۆالدەستىڭ دۇيسەنبىدە سينالوا شتاتىنداعى  كۋلياكان قالاسىندا  ولى دەنەسى تابىلدى. وسى ۋاقىتقا دەيىن ەسىرتكى ديلەرلەرى تۋرالى جۋرناليستىك زەرتتەۋلەرى مەن ماقالالارىمەن تانىلعان مەكسيكالىق جۋرناليست ءوزىنىڭ رەداكتسياسىنىڭ الدىندا ولتىرىلگەن.

2011 جىلى رەپورتەر ەسىرتكى ساۋداسى ماسەلەسىنە بايلانىستى ەڭبەگى ءۇشىن جۋرناليستەردى قورعاۋ كوميتەتىنىڭ ارنايى سىيلىعىن العان ەدى.

ءوزىنىڭ 30 جىلدىق مانسابىندا حاۆەر ۆالدەس مەكسيكاداعى قىلمىستىق توپتار مەن ەسىرتكى ديلەرلەرى تۋرالى كوپتەگەن تەرگەۋ جۇمىستارىن جۇرگىزىپ، قۇقىق قورعاۋ ورگاندارىنا قىلمىسپەن كۇرەسۋگە وزىندىك كومەگىن تيگىزگەن بولاتىن.

ءجۋرناليستىڭ زەرتتەۋىنە سايكەس، اقش-قا تاسىمالداناتىن ەسىرتكىنىڭ تورتتەن ءبىر بولىگى - مەكسيكادان جەتكىزىلەدى ەكەن. الەمدەگى ەسىرتكى ساۋداسىمەن اينالىساتىن ەڭ تانىمال ديلەرلىك توپتىڭ باسشىسى حواكين گۋزمان 2014 جىلى ۇستالىپ، بۇگىندە اقش-تا قاماۋعا الىنعان.

مەكسيكا پرەزيدەنتى ەنريكە پەنيا نەتو ءجۋرناليستىڭ ولىمىنە بايلانىستى تەرگەۋ جۇمىستارىن جۇرگىزىپ، قىلمىسكەرلەردى تەز ارادا قۇرىقتاۋعا بۇيرىق بەرگەن. ال ارىپتەستەرى مەن حاۆەر ۆالدەستىڭ وتباسى قۇقىق قورعاۋ ورگاندارىنىڭ قورعاۋىنا الىنعان.

وسى جىلدىڭ ناۋرىز ايىندا مەكسيكادا ەسىرتكى ساۋداسى تۋرالى جازاتىن تاعى ءبىر جۋرناليست ولتىرىلگەن ەدى.

ال جۋرناليستەردى قورعاۋ كوميتەتىنىڭ ەسەبىنە سۇيەنسەك، ەلدە 1992 جىلدان بەرى 40-تان استام جۋرناليست قىلمىستىق توپتاردىڭ قاتىسۋىمەن ازاپتالىپ، ولتىرىلگەن ەكەن.

“The Qazaq Times”