مەملەكەت باسشىسى قاراعاندى وبلىسى شاحان كەنتىندە كوپ پاتەرلى ءۇيدىڭ كىرەبەرىسى قۇلاپ، ادام شىعىنىنا اكەپ سوقتىرعانى تۋرالى حاباردى زور كۇيزەلىسپەن قابىلدادى دەپ حابارلايدى اقوردانىڭ رەسمي سايتى.

نۇرسۇلتان نازارباەۆ قازا بولعانداردىڭ تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.

قازاقستان پرەزيدەنتى قاراعاندى وبلىسىنىڭ اكىمىنە، سونداي-اق ۋاكىلەتتى مەملەكەتتىك ورگاندارعا زارداپ شەككەن تۇرعىنداردىڭ بارىنە جان-جاقتى كومەك كورسەتۋ ءۇشىن ءتيىستى شارالار قابىلداپ، توتەنشە وقيعانىڭ سەبەبىن انىقتاۋ جونىندە تاپسىرما بەردى.

ەسكە سالا كەتسەك، جاڭا جىلدىڭ العاشقى كۇنى، ياعني 1 قاڭتار ساعات 22.40-تا قاراعاندى وبلىسى توتەنشە جاعدايلار دەپارتامەنتىننىڭ قۇتقارۋ بولىمشەلەرىنە قاراعاندى وبلىسى شاحتينسك قالاسىنىڭ شاحان اۋىلىندا كوپ قاباتتى ءۇيدىڭ ءبىر بولىگىنىڭ قۇلاعانى تۋرالى اقپارات كەلىپ تۇسكەن ەدى.

وقيعا ورنىنا توتەنشە جاعدايلار دەپارتامەنتىنىڭ كۇشتەرى مەن تەحنيكالارى جىبەرىلدى.

قۇتقارۋشىلار 10 ادامدى ەۆاكۋاتسيالاپ، 4 ادامدى قۇتقاردى. سونداي-اق، ۇيىندىلەر اراسىنان 9 ادامنىڭ ءمايىتى تابىلدى. ونىڭ ىشىندە ءۇش ەر ادام، ءۇش əيەل ادام، ءۇش بالا، ولاردىڭ ەكەۋى 2016 جىلى جəنە 2010 جىلى تۋعان. سونداي-اق ءتىرى قالعان 32 جاستاعى ەر ادام شىققان.

قازىر وبلىس اكىمدىگى مەن ءتيىستى ورگاندار اپاتتىڭ سەبەبى مەن شىعىنىن انىقتاۋدا. زارداپ شەككەندەرگە كومەك قاراجات بەرىلەتىن بولدى. سونداي-اق، وسى قايعىلى وقيعاعا بايلانىستى قىلمىستىق ءىس قوزعالدى.

"The Qazaq Times"