باراك وباما قايتىپ ورالدى، ترامپ تۋرالى پىكىر ءبىلدىردى

اقش-تىڭ بۇرىنعى پرەزيدەنت باراك وباما دۇيسەنبى كۇنى ءوزىنىڭ ەكىنشى اۋىلى سانالاتىن چيكاگو ۋنيۆەرسيتەتىنە (University of Chicago)  بارىپ،  جاستارمەن اشىق پىكىرلەستى. "The New York Times" باسىلىمىندا وبامانىڭ اق ۇيدەن كەتكەننەن بەرگى العاش رەت كوپشىلىك ورتامەن جۇزدەسۋى تۋرالى جازىلعان بولاتىن.

مىندەتىن ترامپقا وتكىزىپ بەرگەننەن كەيىن،  وباما ءۇش ايعا جۋىق دەمالىستا بولدى. الايدا،  ونىڭ قىزمەتشىلەرى ۋاشينگتونداعى كەڭسەسىن،  چيكاگوداعى كىتاپحانا قۇرۋ ىستەرىن جوسپار بويىنشا جۇرگىزىپ جاتتى. دەمەك،  وباما دا كوپ وتپەي ءوز جۇمىسىنا كىرىسەدى.

دەگەنمەن،  ءبىر كەزدە اق ۇيدە وتىرىپ،  الەم نازارىن وزىنە اۋدارعان باراك وباما اقش پەن ەۋروپا ەلدەرى اراسىنداعى اشىق اڭگىمەلەردىڭ بەتىن اشپاقشى.

كومەكشىسىنىڭ ايتۋىنشا،  وبامانىڭ اق ۇيدەگى ورنىنا وتىرا سالا-اق،  ونىڭ ۇستانعان ساياسي باعىتتارى مەن جەتىستىكتەرىن جوققا شىعارىپ،  كەكەسىن پيعىل تانىتا بەرگەن ترامپقا بىردەن قارسى كەلۋ ويىنان اۋلاق.

الايدا،  دۇيسەنبىدەگى وبامانىڭ ءىس-ارەكەتىنەن ونىڭ قانشالىقتى قىسىمدا جۇرگەنىن بايقاۋ قيىن ەمەس. ويتكەنى،  وباما وزىنە كەزدەسكەندەر اراسىنان التى ستۋدەنتكە عانا شەشىلە اڭگىمە ايتقان. ول جاستارعا قوعامدىق ۇيىمداسۋدىڭ،  قوعامدىق ماسەلەلەردەن تارتىنباۋدىڭ،  بۇقارالىق بەلسەندىلىكتىڭ ماڭىزدىلىعى تۋرالى كوبىرەك توقتالعان. ال،  جاستار كوبىنەسە يمميگراتسيا،  كليماتتىڭ جىلىنۋى،  ناسىلدىك جانە ۇلتتىق تەڭدىك قاتارلى تاقىرىپتاردا سوزگە تارتقىسى كەلگەن. بىراق، وبامانىڭ كوپشىلىك ورتادا اتالعان تاقىرىپتا ايتقان  اربىر اۋىز ءسوزى، ترامپ جاعىنان تىڭدالۋى ابدەن مۇمكىن.

ءتىپتى ستۋدەنتتەردەن: «ءوزىڭىز 8 جىل تىزگىنىن ۇستاعان الىپ ەل جايلى، ونىڭ بۇگىنگى بيلىك جۇيەسى مەن پرەزيدەنتى تۋرالى قانداي باعا بەرەسىز؟ – دەگەن ساۋالداردا قويدى.

وباما بيلىككە كەلگەن كەزدەردە مىنبەرلەردە  جانە باسقا دا كوپشىلىك ورتادا وزىنەن بۇرىنعى پرەزيدەنت بۋشقا قۇرمەت ءبىلدىرىپ،  ونىڭ ءوزىن سىنعا الۋىنان ساقتانا بىلگەن بولاتىن. دەگەنمەن،  دجوردج بۋش ەلدىڭ بيلىك تاعىنان ءبىرجولاتا الىستاپ كەتكەن ەدى. وبامانىڭ وزىنەن بۇرىنعى پرەزيدەنتكە قۇرمەت كورسەتە ءبىلۋى، مىندەتتى تۇردە ونىڭ ساياساتىن جالعاستىرامىن دەگەنى ەمەس ەدى. بۇل ايتىلعانداردى سالىستىرىپ قاراعاندا،  اتالعان مىسالداردىڭ بارلىعى وبامانىڭ ترامپ جونىندە سىن ايتۋىنىڭ قيىن بولاتىنىن اڭعارتقانداي.

وبامانىڭ بيلىكتەن كەتكەننەن كەيىن العاش كوپشىلىك ورتامەن كەزدەسۋىن چيكاگودان باستاۋىنىڭ دا وزىندىك سەبەبى بار. ونداعان جىل بۇرىن باراك وباما ءوزىنىڭ ۇيىمداستىرۋ قابىلەتىن وسى ارادا العاش ايگىلەگەن بولاتىن. ياعني، ول ەلگە تۇتقا بولۋعا لايىق ازاماتتىڭ ۇلى ساپارىن ءدال وسى ارادا باستادى دەۋگە بولادى.

بيىل قاڭتار ايىندا دا سوڭعى رەت پرەزيدەنتتىك سالاۋاتىمەن وسى اراعا كەزدەسۋگە كەلگەن بولاتىن. 10 قاڭتاردا وباما ءوزىنىڭ ارمان مەن جالىنعا تولى جاستىق شاعىنىڭ وسى قالادا وتكەنىن ەسىنە الا وتىرىپ: «عۇمىردىڭ اسا ءبىر جىڭىشكە جولىندا  سەنىمنىڭ كۇش-قۋاتىن،  كۇرەسكەر حالىقتىڭ جەڭىلىس الدىندا دا ءۇنسىز سابىر ساقتاي بىلەتىن سالماقتىلىعىن وسى ارادا العاش رەت اڭعارعان ەدىم. ءدال وسى جەردە – اركىم ءوزىن قاراپايىم بۇقارادان بولە قاراماي،  جۇرتپەن بىرگە جۇمىس ىستەگەندە عانا ۇلى وزگەرىستەر جاساي الاتىنىن سەزىنگەن ەدىم»، – دەگەن بولاتىن.

ساراپشىلار وباما دۇيسەنبى كۇنگى كەزدەسۋدە مۇمكىن پرەزيدەنتتىككە قوش ايتقان ساتتەگى سوزدەرىن قايتالاپ،  كوپشىلىكتى شىن مانىندە دەموكراتيانىڭ شىنايى ومىردە جوق ەكەنىن ەسكەرتكەن بولار دەيدى.

وباما پرەزيدەنتتىكتەن كەتەر شاعىندا: «ەگەر سەن الەۋمەتتىك جەلىدە وتىرىپ الىپ بەيتانىس ادامدارمەن سالعىلاسۋدان شارشاساڭ،  وندا شىنايى ومىردە بار ادامدارمەن ارالاسۋدىڭ ءدامىن تات»، – دەگەن بولاتىن. ول جانە ترامپقا قاراتىپ: «ەگەر  بىرەر ىسكە شەشىم قابىلداۋىڭا تۋرا كەلسە،  اياق كيمىڭنىڭ باۋىن بەرىك بايلاپ،  بىرقاتار ۇيىمداستىرۋ جۇمىسىن ىستە. ال سەنىڭ سايلاپ شىققان ادامدارىڭ ۇمىتتەن شىقپاسا،  «جارايدى-اۋ» دەگەندەردىڭ اتىن تاقتاعا جازىپ،  سايلاپ الۋىڭا بولادى. قوزعال،  قيمىلدا،  ءارى شىداي ءتۇس! بىردە جەڭەرسىڭ،  بىردە جەڭىلەرسىڭ!  بىراق، كوپ جاعدايدا سەنىڭ اقش پەن ونىڭ حالقىنىڭ جۇرەگىندەگى سەنىمىڭ ورنىعا تۇسەدى»،– دەگەن ەدى.

اۋد.: ادىلەت احمەت

The Qazaq Times