قازاقستان ەل ەكونوميكاسىنا 300 مىڭ دوللار ينۆەستيتسيا سالعان شەتەلدىكتەرگە ۋاقىتشا تۇرۋ قۇجاتىن بەرۋدى جوسپارلايدى. بۇل تۋرالى ساۋدا جانە ينتەگراتسيا ءمينيسترى سەرىك جۇمانعارينگە سىلتەمە جاساپ جەرگىلىكتى Tengrinews.kz سايتى حابارلادى،- دەپ جازدى ورتالىق ازيا جاڭالىقتار قىزمەتى.

"قازاقستان ەكونوميكاسىنا 300 مىڭ دوللار ينۆەستيتسيا قۇيعان شەتەلدىك بيزنەسمەندەرگە ون جىلدىق ۆيزا بەرۋدى قاراستىراتىن زاڭ جوباسى دايىندالىپ جاتىر" دەپ جاۋاپ بەرگەن جۇمانعارين پارلامەنتتەگى "اق جول" فراكتسياسىنىڭ ساۋالىنا.

مينيستر ون جىلدىق ۆيزا بەرگەندە بيۋدجەتكە سالىقتان تۇسەتىن پايدا مەن جاڭا جۇمىس ورىندارىنىڭ اشىلۋ جاعى ەسكەرىلەدى دەپ وتىر.

رەسەي بيلىگى ۋكرايناداعى سوعىسقا بايلانىستى 21 قىركۇيەكتە موبيليزاتسيا جاريالاعان سوڭ قازاقستانعا 300 مىڭداي رەسەيلىك قاشىپ كەلگەن، ولاردىڭ جارتىسى ەلدەن كەتكەنى ايتىلدى.

ءىىم مالىمەتىنشە، 21 قىركۇيەكتە 2177 شەتەلدىك تۇراقتى تۇرۋ قۇجاتىن الۋعا ءوتىنىش بەرگەن، ولاردىڭ ىشىندە 998 ادام – رەسەي ازاماتى. ال ازاماتتىق الۋعا 1398 ادام (221 رەسەيلىك) ءوتىنىش جازعان. ەلدە "رەسەيلىكتەر كەلىپ، جۇمىس ورىندارىن الىپ الادى، پاتەر جالداۋ باعاسىنىڭ قىمباتتاۋىنا اسەر ەتەدى" دەگەن قورقىنىش بار. بيلىك الدىمەن قازاقستاندىقتارعا جاعداي جاسالادى دەپ قوعامداعى قورقىنىشتى سەيىلتۋگە تىرىسىپ جاتىر.

وتكەن اپتادا قازاقستان پرەزيدەنتى قاسىم-جومارت توقاەۆ رەسەيدە ورنالاسقان 50-دەن اسا ءىرى حالىقارالىق كومپانيا قازاقستانعا كەلۋگە دايىن دەپ مالىمدەگەن. ۇكىمەتتىڭ اقپاراتىنشا، حالىقارالىق 300 كومپانيا رەسەيدەگى كەڭسەلەرىن قازاقستانعا كوشىرۋگە دايىن.

بۇعان دەيىن توقاەۆ ۇكىمەتكە رەسەيدەن كەتكەن شەتەلدىك كومپانيالاردى قازاقستانعا ورنالاستىرۋعا جاعداي جاساۋدى تاپسىرعان.