20 قازان كۇنى جەتىسۋدىڭ وبلىستىق سوتىنىڭ قىلمىستىق ىستەر جونىندەگى سوتى قاڭتار قىرعىنى كەزىندە قامالعانداردى ۇتىك باسىپ ازاپتادى دەپ ايىپتالعان پوليتسيا قىزمەتكەرى كەنجەباەۆ ايدىن قايتادان قاماۋعا الدى. ال وسى ىسپەن قاتار قارالىپ جاتقان وزگە ءتورت پوليتسەي ءۇي قاماعىنا ۇكىم ەتتى. بۇل تۋرالى جابىرلەنۋشىلەردىڭ قۇقىن قورعاپ جۇرگەن  "قاڭتار" قورىنىڭ ادۆوكاتى اسەم ءتۇسىپوۆا مالىمدەدى.

وسى كۇنگە دەيىن كەپىلدىكپەن بوستاندىقتا جۇرگەن كۇدىكتىلەردى قاماۋعا الۋ تۋرالى ءوز قورعاۋىنداعى ادامداردىڭ شاعىمى بويىنشا كۇدىكتەلەردىڭ بۇلتارپاۋ شاراسىن وزگەرتۋدى ءوتىنىش ەتكەن ادۆوكات وبلىستىق سوتقا ارىزدانعان.

ادۆوكات ءتۇسىپوۆا وبلىستىق سوت ارىزىن قاراپ ءىس بويىنشا «سوت ايدىن كەنجەباەۆتى قاماۋعا الۋعا شەشىم شىعاردى. ونى سوت زالىنان قاماۋعا الدى. بۇدان وزگە ءتورت پوليتسيا قىزمەتكەرى توقتاش، نۇرتازا، بوقانوۆ، جۇماشوۆ كەپىلمەن ۇيقاماققا الىندى»، - دەدى. سونداي-اق، ءوزىنىڭ 21 قازاندا قاۋلىمەن تانىسقانىن ايتتى.

قاۋلىدا قايرات يمانحانوۆ توراعالىق ەتكەن سوتتا سۋديالار ە.جۋرحانوۆ، ءا. ساعىمبەكوۆتار جەتىسۋ وبلىسى تالدىقورعان قالالىق سوتىنىڭ 2022 جىلعى 09 قىركۇيەكتەگى قاۋلىسىن بۇزۋعا ۇكىم شىعاردى.

"سوتتالۋشى ايدىن ەركىنۇلى كەنجەباەۆقا "ۇيقاماق" تۇرىندەگى بۇلتارتپاۋ شارالارى وزگەرتىلىپ، وعان "كۇزەتپەن ۇستاۋ" بۇلتارتپاۋ شاراسى قولدانىلسىن، سوت زالىنان دەرەۋ قاماۋعا لىنسىن.

سوتتالۋشىلار ساپارمۇرات ەربولاتۇلى توقتاشقا، جانباقىت نۇرباقىتۇلى نۇرتازاعا، الماس اديلبەكوۆيچ بوكانوۆ جانە ەرمەك ەربولاتوۆيچ مۋماشوۆقا "كەپىل" تۇرىندەگى بۇلتارتپاۋ شارالارى وزگەرتىلسىن، ولارعا "ۇيقاماق" تۇرىندەگى بۇلتارتپاۋ شارالارى قولدانىلسىن", -دەلىنگەن.

بۇدان بۇرىن جەتى رەتكى سوت وتىرسى وتكەن تالدىقورعان قالالىق سوتىندا دا ءتۇسىپوۆا كۇدىكتەلەردى قاماۋ تۋرالى قالالىق سوتقا شاعىمدانعان-تۇعىن. الايدا سۋديا بەكمۇرات دۇيسەنبەكوۆ ونى قاناعاتتاندىرماعان.

بەس پوليتسەي كۇدىكتى سانالعان ازاپتاۋ ءىسى بويىنشا 23 جابىرلەنۋشى بار. ولاردىڭ بارلىعى دەرلىك سوتقا قاتىسپايدى. وزدەرىنىڭ ايتۋىنشا "كۇشتىك قۇرلىمدار كوبىنىڭ اۋزىن جاۋىپ كۋالىك بەرۋدەن باس تارتقىزىپ وتىر", -دەپ سانايدى.

ماتەريال تولىقتىرىلدى