فوتو: abai.kz

بۇگىن ارمەنيا پارلامەنتىندە پرەمەر-ءمينيسترى نيكول پاشينيان ازەربايجانمەن قاقتىعىستا 49 ادامنىڭ قازا تاپقانىن حابارلادى.

پاشينيان «ارمەنيا قورعانىس مينيسترلىگىنىڭ مالىمەتى بويىنشا، قازىر بىزدە 49 ادام قايتىس بولدى، بىراق بۇل سوڭعى كورسەتكىش ەمەس» دەگەندى ايتتى.

ول ءازىربايجاننىڭ 2020 جىلدىڭ قاراشاسىندا قول جەتكىزىلگەن كەلىسىمدەرگە كەلىسپەيتىندەرىن ايتتى.

پاشينيان ارمەنيا ۇكىمەتىنىڭ ۇجىمدىق قاۋىپسىزدىك شارتى ۇيىمىنا رەسمي ءوتىنىش جاساۋ تۋرالى شەشىم قابىلداپ، اقش مەملەكەتتىك حاتشىسى انتوني بلينكەنمەن ازەربايجان-ارمەنيا شەكاراسىنداعى قاقتىعىستارعا بايلانىستى تەلەفون ارقىلى سويلەسكەن.

ارمەنيا پرەمەر-مينيسترلىگىنەن جاسالعان جازباشا مالىمدەمەگە قاراعاندا پاشينيان كەزدەسۋدە بلينكەنگە شەكاراداعى جاعدايعا بايلانىستى الاڭداۋشىلىعىن جەتكىزدى.

اقش مەملەكەتتىك حاتشىسى بلينكەن دە جاعدايدىڭ ودان ءارى شيەلەنىسۋىنە جول بەرىلمەيتىنىن ايتتى.

بلينكەن اقش-تىڭ جاعدايدى تۇراقتاندىرۋعا كۇش سالۋعا دايىن ەكەنىن ءبىلدىردى.

ارمەنيا ۇكىمەتىنەن جاسالعان مالىمدەمەدە پاشينياننىڭ ەۋروپا وداعى كەڭەسىنىڭ توراعاسى چارلز ميشەل جانە يران پرەزيدەنتى يبراحيم رەيسيمەن تەلەفون ارقىلى سويلەسىپ، ازەربايجان-ارمەنيا شەكاراسىنداعى سوڭعى قاقتىعىستاردى تالقىلاعانى حابارلاندى.

سونداي-اق، نيكول پاشينيان رەسەي پرەزيدەنتى ۆلاديمير پۋتين جانە فرانتسيا پرەزيدەنتى ەممانۋەل ماكرونمەن تەلەفون ارقىلى سويلەستى.

ازەربايجان قورعانىس مينيسترلىگى ارمەنيا ارمياسىنىڭ شەكارانىڭ داشكەسەن، كەلباجار جانە لاچىن باعىتتارىندا كەڭ كولەمدە ارانداتۋشىلىق جاساعانىن حابارلاعان بولاتىن.

ازەربايجان-ارمەنيا شەكاراسىندا ەكى ەلدىڭ اسكەري جاساقتارى اراسىندا كەسكىلەسكەن قاقتىعىس بولىپ ەكى جاقتان دا ادام شىعىنى بولعان.

“The Qazaq Times”