قىتايدا اۆتورلىق قۇقىقتى رەتتەپ وتىراتىن سايت اشىلدى

قىتايدىڭ ورتالىق تەلەارناسى  (CCTV) ەلدەگى اۆتورلىق قۇقىقبۇزۋشىلىقتاردى انىقتايتىن سايتتىڭ ىسكە قوسىلعانىن حابارلادى. 

www.12426.cn سايتى - قحر-نىڭ جەكە مەنشىك قۇقىعىن قورعاۋ ورتالىعىنىڭ ماماندارىمەن جۇرگىزىلەتىن بولادى. بۇل جوبانىڭ ماقساتى - پلاگياتتى جانە پيراتتىق كوشىرمەلەردى ازايتىپ، اۆتورلىق قۇقىقتىڭ بۇزىلۋىنىڭ الدىن الۋ.

سايتتىڭ كومەگىمەن ينتەللەكتۋالدى قۇقىق يەلەرى وزدەرىنىڭ تۋىندىلارى جايلى كەز-كەلگەن ۇرلىق جانە قۇقىقبۇزۋشىلىقتار جايلى اقپارات الىپ وتىرادى. ەگەر وسىنداي جاعدايلار ورىن السا، زاڭعا سايكەس ارەكەت ەتۋگە جانە وزدەرىنىڭ قۇقىقتارىن قورعاۋعا بايلانىستى اقپارات  الادى. سايت تاۋلىك بويى جۇمىس جاسايتىن بولادى.

قحر  توراعاسى شي جينپين ەلدەگى ينتەللەكتۋالدى قۇقىقتى قورعاۋ ماسەلەسىن رەتتەستىرۋ جايلى بۇيرىق بەرگەن بولاتىن. وسى جوبانى جۇزەگە اسىرا وتىرىپ الەمدىك نارىقتا ساپانى ساقتاپ، باسەكەگە قابىلەتتى بولاتىندىعىن ايتقان.

2016 جىلى قىتايدا قۇقىق قورعاۋ ورگاندارى ينتەللەكتۋالدى مەنشىككە قول سالعانى ءۇشىن 3,8 مىڭ ادام قىلمىستىق جاۋاپكەرشىلىككە تارتىلعان. ولاردىڭ كوپشىلىگى ساۋدا بەلگىلەرىن زاڭسىز پايدالانعاندارى ءۇشىن سوتتالعان.

"The Qazaq Times"