سۋ-تىرشىلىك كوزى، دەسە دە بۇل تالعار اۋداندىق اكىمشىلىك پەن سۋعا جاۋاپتى قۇزىرلى ورگاننىڭ جاۋاپتى تۇلعالارىن قىزىقتىرمايتىن كورىنەدى. بولماسا، وسى اۋدانعا قاراستى قىزىل-قايرات اۋىلىنداعى سۋ قۇبىرىنىڭ جارىلىپ، سۋدىڭ دالاعا اعىپ جاتقانىنا جارتى جىلعا جۋىق ۋاقىت بولدى، تۇرعىنداردىڭ ەسكەرتكەنىنە قاراماستان وسىعان دەيىن ەشكىم بوي كورسەتپەگەن. اۋىز سۋدىڭ ىسىراپ بولىپ جاتقانى وكىنىشتى. "سۋدىڭ دا سۇراۋى بار " دەۋشى ەدىك، دالاعا اعىپ جاتقان تازا سۋدىڭ شىعىنىن كىم وتەيدى؟ ەستيتىن ۇكىمەتتىڭ ەستيتىن قۇلاعى قاشان ەستيدى؟

بۇل سۋدىڭ اعىپ جاتقانىنا ءبىراز ۋاقىت بولعاندىقتان، تەرەڭ شۇڭقىرعا اينالعان، ويىن بالاسىنىڭ سۇيىكتى ورنى. تۇرعىنداردى الاڭداتىپ وتىرعان ماسەلەنىڭ ءبىرى دە وسى.
ەلىمىزدە اۋىز سۋعا ءزارۋ ەلدى مەكەندەردىڭ كوپ ەكەنىنە قاراماستان، اۋىز سۋدىڭ قادىرىن بىلمەيتىن اكىمدەر بار كورىنەدى.

بەيرەسمي اقپارتاقا قاراعاندا جاڭادان قۇرىلعان الماتى وبلىسىنىڭ جاڭا اكىمى مارات سۇلتانعازيەۆ 17 ماۋسىمدا تالعار اۋدانى تۇرعىندارىمەن جولىقپاق كورىنەدى. وبلىستىڭ اتاۋى مەن اكىم جاڭارعانىمەن اۋىلدىڭ تىرشىلىگى جاڭارعان جوق. سول باياعى باتپاق جول، جارىلعان قۇبىر، ەشقانداي قاۋىپسىزدىك شارالارى قاراستىرىلماعان ەلەكتر جەلىسى. اۋدان مەن اۋىل اكىمدىگىنە قانشا ەسكەرتىلسەدە قاراۋسىز كەلە جاتقان ەسكى قۇبىردىڭ جايىن ەندى جاڭا اكىمگە جەتكىزىگە تىرىساتىن بولامىز.

جاڭا اكىمنەن وسى قوردالانعان ماسەلەلەردى ەرتە شەشىپ بەرەر دەگەن ۇمىتتەمىز.

ءنۇرباتيما بايتۇرسىن

الماتى وبل. تالعار اۋدانى

قىزىل-قايرات اۋىلى