بالالار جازعى دەمالىستارىن قالاي وتكىزىپ جاتىر؟

بالالار جازعى دەمالىستارىن قالاي وتكىزىپ جاتىر؟ 3 اي دەمالىستىڭ 2 ايى وتە شىقتى. جازدىڭ سوڭعى ايىندا بالالار ءۇشىن قانداي دەمالىس ىڭعايلى؟ قالانىڭ بالالارى اۋىلداعى اتا-اجەسىنىڭ قاسىندا دەمالىستارىن وتكىزسە، اۋىل بالالارىنا قالانىڭ اتتراكتسيوندارى قىزىق. كوپتەگەن بالالار اتا-اناسى جۇمىستا بولعاندىقتان، ۇيدە قامالىپ، تەلەديدار مەن سمارتفوندى ەرمەك ەتەدى. 14 جاستان اسقان جەتكىنشەكتەر جۇمىس ىستەپ اتا-اناسىنا قولعابىسىن تيگىزەدى. سولاي بولسا دا بالالار ءۇشىن جۇيەلى دەمالىس ۇيىمداستىرۋعا كوپ ساندى اتا-انالاردىڭ جاعدايى كەلە بەرمەيدى. بيىلعى بالالار جىلىنا وراي، مەملەكەت تاراپىنان قانداي كومەكتەر جاسالدى؟
بالالاردىڭ رۋحاني ءوسۋى ءۇشىن مۋزەي مەن كىتاپحانالارعا بارىپ، قۇندى دۇنيەلەرمەن تانىسۋعا بولادى.ۇلتتىق اكادەميالىق كىتاپحانادا «ماڭگىلىك ەل قۇندىلىقتارى»، «ارداق تۇتار الىپتارى»، «مەنىڭ سۇيىكتى كىتاپتارىم» اتتى كەڭ كولەمدى ءيلليۋستراتيۆتى كورمە تۇراق­تى تۇردە ۇيىمداستىرىلادى. كور­مەگە كىتاپتارمەن قاتار ءتۇرلى فورماتتاعى 100-گە تارتا بالالارعا ارنالعان قۇجات قويىل­عان. سونداي-اق جازعى دەمالىس كەزىندە Qazaqstan ورتالىق كونتسەرت زالىنداعى كينوكورسەتىلىمدەرىن  تاماشالاۋ مۇمكىندىگىنە يە بولدى. جاس كورەرمەندەر بىرنەشە اي بويى وتاندىق تانىمال «كۇلتەگىن»، «ايداحار»، «مۇزبالاق»، «ەر توستىك»، «كەنجە قىز» انيماتسيالىق تۋىندىلارىن، سونداي-اق «پاراليمپياداشى»، «ۆرەميا پاتريوتوۆ»، «بوكسەر»، «كانيكۋلى وففلاين» كوركەم فيلمدەرىن تەگىن تاماشالاي الادى.
بالالارعا ۇلتتىق قۇندىلىقتاردى ناسيحاتتاۋ ماقساتىندا ماۋسىم ايىندا ءار-ءتۇرلى ءىس-شارالاردى مەكتەپ جانىنداعى لاگەرلەردە وتكىزىپ ەدى، الايدا، ولار بالالاردى قانشالىقتى قاناعاتتاندىرا الدى؟ ول جۇمىستار ءار وڭىردە ءار دەڭگەيدە ءوتتى.
اعىمداعى جىلدىڭ ءبىرىنشى توقسانىنىڭ قورىتىندىسى بويىنشا ەلىمىزدە 111 بالالار لاگەرى جۇمىس ىستەيدى. بالالار لاگەرلەرىنىڭ ىشىندە 61 مەملەكەتتىك. تاعى 48 لاگەر - جەكە جانە 2- شەتەلدىك لاگەر بار، لاگەرلەردىڭ جەتىسپەۋشىلىگى بايقالادى.جولداماعا بارلىق بالانىڭ قولى جەتە بەرمەيدى. سوندىقتان، ۇيدە بولسا دا بالالارىڭىزعا كوڭىل ءبولىپ، پايدالى، جۇيەلى دەمالىس ۇيىمداستىرا ءبىلىڭىز. تابيعات اياسىندا ءجيى وتباسىلىق دەمالىس ۇيىمداستىرىپ، تازا اۋادا سەرۋەندەڭىز، مۋزىكا تىڭداپ، سپورتتىق ويىندار نەمەسە بالا قىزىعاتىن ويىنداردى بىرلىكتە ويناڭىز، اڭگىمەلەسىڭىز، ءحوببيىن ءبىلىپ، بالانىڭ جاسىرىن قابىلەتتەرىن اشۋعا كومەكتەسىڭىز. ءبىر دەمالىستا حايۋاناتتار پاركىنە، كەلەسى ۋاقىتىڭىز بولعاندا كينوتەاترعا، مۋلتفيلم كورۋگە بارىڭىز. بالامەن بىرگە جۇرگەنىڭىزدىڭ ءوزى بالا ءۇشىن ۇمىتىلماس دەمالىس. بالانىڭ ارمانىنا قانات ءبىتىرىپ، شابىتتاندىرىپ وتىرىڭىز. الداعى 30 كۇندە قانداي جوسپارىڭىز بار؟ بالاڭىز ءۇشىن نە ىستەي الاسىز؟ قىمبات لاگەر بولماسا دا، قىمبات ۋاقىتىڭىزدى بالاڭىزبەن وتكىزىڭىز.

بايتۇرسىن ءنۇرباتيما