قىتايدىڭ اسكەري كەمەلەرى. فوتو; فرانس-پەرسس

قىتاي حالىق-ازاتتىق ارمياسىنا تيەسىلى اسكەري كەمە العاش رەت افريكا جاعالاۋىندا پايدا بولدى. بۇل قىتايدىڭ شەتەلدەگى اسكەري بازاسىندا العاش رەت اسكەري كەمە ورنالاستىرۋى. وسى ورايدا قىتايدىڭ سوڭعى جىلدارى قارقىندى ۇلعايعان اسكەري ىقپالى تاعى ءبىر رەت نازار اۋدارتىپ وتىر.

قىتاي 2016 جىلى ناۋرىزدا دجيبۋتيدە شەتەلدەگى العاشقى اسكەري بازاسىن قۇرا باستادى. بىراق، قازىرگە دەيىن دورارە پورتىنداعى بازاعا بىردە ءبىر اسكەري كەمە ورنالاستىرماعان. اسكەري ساراپشىلار بۇنى قىتايدىڭ الەم بويىنشا ستراتەگيالىق ىقپالىن قارقىندى كەڭەيتۋ ارەكەتىندە ۇلكەن دامۋ دەپ قاراپ وتىر. سەبەبى، اتالعان پورتتاعى كەمە ارقىلى جەرورتا تەڭىزىنە سناريادتارىن ورنالاستىرۋ ءۇشىن ترامپلين ءرولىن اتقارا الادى جانە جابدىقتاۋ ستانتسياسى رەتىندە قىزمەت ەتە الادى.

فرانس پرەسس اگەنتتىگى امەريكالىق اسكەري ساراپشىلاردىڭ دەرەگىنە جانە جەر سەرىكتەرىنەن تۇسىرىلگەن سۋرەتتەر ارقىلى دجيبۋتيدە ورنالاستىرعان حالىق-ازاتتىق ارمياسىنىڭ «لۋوما حوۋ» (907) اتتى بىرىكتىرىلگەن جەتكىزۋ كەمەسى ەكەنىن حابارلادى. بۇل قىتاي اسكەري-تەڭىز كۇشتەرىنىڭ كەشەندى جابدىقتاۋ كەمەسى، قىتاي اتك-ءنىڭ شەتەلدەگى (شىعىس افريكاداعى) اسكەري وپەراتسيالارىن قامتاماسىز ەتەدى.

قازىر افريكانىڭ شىعىسىنداعى قىتاي اسكەري-تەڭىز كۇشتەرى تەڭىز قاراقشىلىعان قارسى وپەراتسيالاردى جۇرگىزىپ كەلەدى. الايدا، تەڭىز تاسىمالى قاۋىپسىزدىگىن ماقسات ەتكەنىمەن قوسىمشا كوپتەگەن مىندەتتەرىنىڭ بار ەكەنى داۋسىز، ايتالىق بۇل ايماقتان وتەتىن باتىس ەلدەرىنىڭ اسكەري كەمەلەرىن باقىلاۋعا زور مۇمكىندىگى بار. فرانس پرەسكە سۇحبات بەرگەن امەريكالىق ساراپشى ساتتوننىڭ ايتۋىنشا  قىتايلىق اسكەري-تەڭىز كۇشتەرىنىڭ كونتينگەنتى ەسمينەتستەر مەن فرەگاتتاردان تۇراتىنىن، بىراق بولاشاقتا ۇلكەنىرەك اسكەري كەمەلەر قوسىلۋى دا مۇمكىن ەكەنىن ايتادى.

قىتايدىڭ شىعىس افريكادا اسكەري بازاسىنىڭ بولۋى عانا ەمەس، وندا اسكەري كەمەلەردىڭ ورنالاسا باستاۋى ءۇندى-تىنىق مۇحيتىنداعى باستى باسەكەلەسى امەريكا قۇراما شتاتتارىن الاڭداتىپ وتىر. ايتالىق، اقش-تىڭ افريكاداعى باس قولباسشىسى گەنەرال ستيۆەن تاۋنسەند قىتايدىڭ افريكانىڭ بارلىق ەلدەرىندە ورنالاسىپ، مول ينۆەستيتسيا مەن قىراۋار قارۋ-جاراق جۇمساپ وتىرعانىن باسا ايتادى.

ايتا كەتۋ كەرەك، قىتاي جوعارىدا اتالعان الىپ ايماقتا ءوزىنىڭ ستراتەگيالىق ىقپالىن ارتتىرۋ ءۇشىن ەكۆاتورلىق گۆينەيادا نەمەسە سولومون ارالدارىندا ەكىنشى شەتەلدىك اسكەري بازا سالۋدى جوسپارلاپ وتىر دەگەن اقپارات تا بار.

The Qazaq Times