تايۋان ءسىم جاسشىسى پولشاداعى ۋكراين بوسقىندارىنا كومەك بەرۋ شاراسىندا. فوتو: VOA

رەسەي مەن ۋكراينا اراسىنداعى سوعىستى الەمنىڭ بىراقاتار ەلى قالت جىبەرمەي باقىلاپ وتىر. ونىڭ قاتارىندا قازاقستان دا بار، ۇيتكەنى ەل ازاماتتارىن ۋكراينا جاعدايى ەرتەڭگى كۇنى بىزدە قايتالانۋى مۇمكىن دەپ الاڭدايدى. ءدال وسىعان ۇقساس الەمنىڭ و شەتىندە جاتسا دا ۋكراينانادى جاعدايدى ۇزدىكسىز باقىلاپ وتىرعان تاعى ءبىر ەل تايۋان (تايۆان).

رەسەي ۋكرايناعا باسىپ كىرۋدەن بۇرىن دا بۇل تاقىرىپتى تايۋان ساراپشىلارى كوپتەپ قاراستىرعان. ارالدى ەل ءوز تاعدىرىن ۋكرايناداعى جاعدايمەن بايلانىستىرادى. سەبەبى، رەسەي ۋكراينادا دەگەنىنە جەتسە بۇل بەيجىڭنىڭ تايۋاندى كۇشپەن بىرىكتىرۋگە دەگەن باتىلدىعىن ارتتىرادى دەپ سانايدى.

كەشە، تايۋان ءسىم باسشىسى ۋ جاۋشيە مالىمدەمە جاساعان كەزدە: «ۋكرايندەردىڭ تىنىمسىز كۇرەسى تايۋان حالقىن شابىتتاندىردى»، – دەگەن پىكىرىن جەتكىزدى.

2 ناۋرىزدان باستاپ تايۋان سىرتقى ىستەر مينيسترلىگى «تابيعي اپاتتان زارداپ شەككەندەرگە قولداۋ كورسەتۋ» قورىنان ۋكرايناداعى زارداپ شەككەن ازاماتتارعا كومەك بەرۋ ماقساتىنداعى ارنايى ەسەپشوتتى اشتى. نە ءبارى بەس كۇن ىشىندە تايۋاندىقتان 300 ملن تايۋان دوللارىن (شامامەن 10,5 ملن اقش دوللارىن) كومەككە اتاعان.

تايۋان ءسىم تارابى ەڭ الدىمەن پولشا شەكاراسىنا كىرگەن ۋكراين بوسقىندارىنا كومەك كورسەتۋ ءۇشىن 100 ملن تايۋان دوللارىن (شامامەن 3,5 ملن اقش دوللارى) بولۋگە شەشىم شىعاردى. شاراعا بايلانىستى ارنايى ءباسپاسوز جيىنىندا تايۋان ءسىم باسشىسى ۋ جاۋشيە: «ۋكرايندەردىڭ تىنىمسىز كۇرەسى اۆتوريتاريزم قىسىمىنداعى تايۋان حالقىنىڭ شابىتى وياندى. قازىر كوپتەگەن تايۋاندىقتار ماعان ۇقساس ىشىنەن “مەن ۋكرايندىقپىن” دەپ ايتادى»، – دەگەن.

قىتاي حالىق رەسپۋبليكاسى قۇرىلعالى بەرى تايۋان بۇعازىنىڭ ەكى جاعالاۋىنىڭ قارىم-قاتىناسى الشاقتادى. تايۋان ءوزىن دەربەس مەملەكەت ساناسا، بەيجىڭ تايۋاندى قحر قۇرامىنداعى ءبىر پروۆينتسيا دەپ سانايدى. بەجىڭ بۇل ءۇشىن «ءبىر قىتاي» قاعيداتىن حالىقارالىق دەڭگەيدە جۇزەگە اسىردى ءارى ونىڭ ديپلوماتيالىق بايلانىس ورناتقان بارلىق ەلدەن تالاپ ەتتى. قكپ تايۋاندى تولىقتاي باعىندىرۋدى ءوزىنىڭ ۇلتتىق پارىزى رەتىندە ناسيحاتتايدى، بۇل ماقساتقا جەتۋ ءۇشىن قارۋ قولدانۋدان باس تارتپايتىنىن دا تالاي رەت قايتالاعان. سوڭعى ۋاقىتتا تايۋانعا باعىتتالعان اسكەري قىسىمدار جيىلەپ كەلەدى.

The Qazaq Times