بايدەن بەيسەنبىدە اقش-تىڭ سانكتسيالارى رەسەي ەكونوميكاسىنا اۋىر قىسىم تۇسىرەتىنىن ايتقان. فوتو: The Guardian

اقش كونگرەسىندەگى ەكى پارتيا دا رەسەي پرەزيدەنتى ۆلاديمير ءپۋتيندى «قاندى قول» دەپ ايىپتاپ، ۋكرايناعا قارسى شابۋىلىن سىنعا الدى. سوعان قوسا، پرەزيدەنت بايدەننىڭ سانكتسيا شارالارى جەتكىلىكسىز ەكەنىن ايتتى. كونگرەستەگى قوس پارتيا بايدەن ۇكىمەتىن رەسەيگە قارسى سانكتسيالاردى ءۇستى-ۇستىنە كۇشەيتىپ، ۋكرايناعا كوبىرەك اسكەري كومەك بەرۋگە شاقىردى.

رەسپۋبليكاشىلدار مەن دەموكراتتار تارابىنان دا ءپۋتيندى ايىپتاعان مالىمدەمەلەر تولاسسىز ايتىلىپ جاتىر. اراسىندا ءپۋتيننىڭ ارەكەتىن ««بۇل گيتلەر ەكىنشى دۇنيەجۇزىلىك سوعىستا پولشاعا باسىپ كىرگەننەن بەرگى ەۋروپاداعى ەڭ ءىرى باسقىنشىلىق، ءپۋتيننىڭ قولىندا قان بار جانە ول بۇل ءۇشىن وتە اۋىر تولەيدى»، – دەگەن پالاتاداعى سىرتقى ىستەر كوميتەتتىڭ رەسپۋبليكاشىل وكىلى مايكل ماككولدىڭ دە پىكىرى بار.

سەناتتىڭ قارۋلى كۇشتەر كوميتەتىندەگى رەسپۋبليكاشىل سەناتور دجەيمس ينحوف بولسا «ونى انىق ايتۋ كەرەك: اقش پەن ءبىزدىڭ وداقتاستارىمىز ونى توقتاتپاسا، ءپۋتيننىڭ امبيتسياسى ۋكراينادا توقتامايدى»، – دەدى.

رەسەيدىڭ ۋكرايناعا باسىپ كىرۋىنە جاۋاپ رەتىندە پرەزيدەنت بايدەن بەيسەنبى كۇنى اق ۇيدە رەسەيلىك بانكتەرگە، وليگارحتارعا جانە جوعارى تەحنولوگيالىق سەكتورلارعا باعىتتالعان سانكتسيالاردىڭ جاڭا كەزەڭىن جاريالاعانىن ايتقان ەدى. ونىڭ ايتۋىنشا سانكتسيالار رەسەيدىڭ بانك جۇيەسىن ودان ءارى بۇعاتتاۋعا باعىتتالعان. بۇل قادام رەسەيدى ەكونوميكالىق تۇرعىدا  وقشاۋلايدى، ءارى الەمدىك قارجى جۇيەسىنەن پۋتين ۇكىمەتىنە ەكونوميكالىق قىسىمدى كۇشەيتىپ، رەسەي ەكونوميكاسىنا قىسىم تۇسىرەدى دەپ باعالانعان.

اق ءۇي مالىمدەمەسىندە بەيسەنبى كۇنى جاريالانعان سانكتسيالاردىڭ رەسەيدىڭ بارلىق جەتەكشى 10 قارجى ينستيتۋتىن قامتيتىنىن جانە ەكسپورتتىق باقىلاۋ رەسەيدىڭ جوعارى تەحنولوگيالىق يمپورتىنىڭ 50 پايىزدان استامىن توقتاتاتىنىن اتاپ وتكەن. سونىڭ وزىندە كونگرەسمەندەر تارابىنان سانكتسيالاردىڭ پارمەندى ءارى جەدەل سوققىلارى تالاپ ەتىلۋدە. ولاردىڭ پايىمىنشا بۇل سانەتسيالار پۋتين بيلىگىن كرەملدەن قۋىپ شىعادى.

ايتا كەتەيىك، رەسەيدىڭ ۋكراينا شەكاراسىنداعى قاۋىپتى اسكەري قيمىلدارىنا بايلانىستى اقش زاڭ شىعارۋشىلارى سوڭعى بىرنەشە اپتادا سانكتسيالار تۋرالى زاڭ بويىنشا كەلىسىمگە كەلە الماي كەلگەن ەدى. رەسپۋبليكاشىلدار ءپۋتيننىڭ ارەكەتتەرىن تەجەۋ ء​​ۇشىن سانكتسيالاردى ەرتەرەك بەلسەندىرۋدى ءجون كورسە، ال دەموكراتتار ديپلوماتيالىق شەشىمگە كەلۋ ءۇشىن ەۋروپالىق وداقتاستارمەن جۇمىس ىستەيتىن بايدەن اكىمشىلىگىن قولداپ كەلگەن.

The Qazaq Times