كيەۆتە ورتكە ورانعان تۇرعىنۇيلەر. فوتو: انتون گەراششەنكو/BBC

رەسەيدىڭ ۋكراينا جەرىندە اسكەري ارەكەتتەردى باستاعانىنا ءبىر تاۋلىكتەن استى. كەي دەرەكتەر رەسەي العاشقى كۇننىڭ وزىندە كيەۆتى باسىپ الۋعا تىرىسادى دەگەن سوزدەر ايتىلدى. قازىر جەتىپ جاتقان اقپاراتتارعا قاراساق شابۋىلدىڭ العاشقى كۇنىندە-اق كۇشتى قارسىلىققا تاپ بولعانىن بايقاۋعا بولادى.

كەشە كەشكى ساعات 19:30 شاماسىندا كيەۆ قالاسىنا اۋە شابۋىلدارى بولۋى مۇمكىن دەگەن مالىمەتتەر تاراعان ەدى، بۇگىن تاڭدا كيەۆ قالاسىندا بىرقاتار تۇرعىنۇي كەشەندەرىندە ءورت بولىپ جاتقانىن ەلدىڭ ءىىم-ءى مالىمدەدى. الدىن الا بولجام بويىنشا زىمىران شابۋىلدارىنان بولعانى ايتقان ءىىم وكىلى قالانىڭ تجق-ءى مەن وزگە دە دەپارتامەنتتەرى كۇشەيتىلگەن رەجيمدە جۇمىس ىستەپ تۇرعانىن ءبىلدىردى.

وسى اقپاراتتارمەن بىرگە ۋكراينا پرەزيدەنتى ۆلاديمير زەلەنسكي «تۆيتتەر» پاراقشاسىندا: «رەسەي اسكەرلەرى چەرنوبىل وقشاۋلانعان ايماعىنا كىرۋگە ارەكەت ەتىپ جاتىر»،  – دەپ مالىمدەدى.

قارۋلى كۇشتەردىڭ جاۋاپتاسقان ۇرىستارى ۋكراينانىڭ وڭتۇستىك جانە سولتۇستىك وڭىرلەرىندە سۇراپىل جالعاسىپ جاتىر. اسىرەسە، گوستومەلسكي اۋەجايى،  گەنيچەسك، سكادوۆسك، چاپلينكا قالالارى ءۇشىن كۇرەس قاتتى جۇرۋدە. ۋكراينانىڭ بوش-ى جاساعان مالىمدەمەدە سچاستە مەن لۋگانسكايا ستانتسالارى ءۇشىن شايقاستاردىڭ اۋىر بولعانى، رەسەي اسكەرلەرىنىڭ بىرنەشە رەت قورعانىس شەبىن بۇزۋعا تالپىنعانى ايتىلادى.

ۋكراينا مەن رەسەي اراسىنداعى شايقاس تەك قارۋ-جاراق پەن اسكەريلەر اراسىندا عانا بولىپ جاتپاعانىن قوس تاراپتان تاراعان اقپاراتتاردان دا بىلۋگە بولادى. قارسى تاراپتىڭ شىعىندارى زورايتىپ كورسەتۋ ءار ەكى تاراپتان دا بولىپ جاتقانداي. ايتالىق، ۋكراينا تارابى «جاۋ اسكەرلەرى شەگىنۋگە ءماجبۇر بولدى» دەگەن كەي جەرلەردە رەسەي تارابى «ۋكراينانىڭ بىردە-ءبىر شەكاراشىسى قالعان جوق» دەگەن قارسى مالىمەتتەر بەرىپ جاتىر.

The Qazaq Times