ۋكرايناداعى اقش ەلشىلىگى. فوتو: Ukrinform.

رەسەي ۋكرايناعا شابۋىل جاساۋى مۇمكىن دەگەن بولجام بارعان سايىن شىندىققا جاقىنداپ، شىعىس ەۋروپاداعى جاعداي شيەلەنىسىپ تۇرعان تۇستا، اقش ۋكرايناداعى ازاماتتارىن ەلدەن شىعىپ كەتۋگە شاقىردى. ءتىپتى، ۋكرايناداعى ەلشىلىك قىزمەتكەرلەرىنىڭ جاقىندارىن ەلگە قايتۋعا بۇيىرعان. 

اقش مەملەكەتتىك دەپارتامەنتىنىنىڭ رەسمي مالىمدەمەسىندە، رەسەي ۋكرايناعا قاراتا قاۋىپتى اسكەري ارەكەتتەر جاساپ جاتقانى ەسكەرتىلگەن. بۇعان قوسا ەل ىشىندەگى ازاماتتارىنا دا جاقىن ارادا ۋكراينا مەن رەسەيگە ساياحات نەمەسە وزگە ماقساتتاعى ساپارلاردان باس تارتۋعا شاقىرادى.

رەسەي بولسا ۋكرايناعا قاراتا اسكەري باسىپ كىرۋ جوسپارىنىڭ جوق ەكەنىن، بۇنداي بولجامدار شىندىققا ساي ەمەس دەپ كەلەدى. دەگەنمەن، اقپارات قۇرالدارى مەن الەۋمەتتىك جەلىلەردە تاراعان مالىمەتتەردە رەسەيدىڭ وزگە ايماقتاعى اسكەري كۇشتەرىنىڭ ەلدىڭ باتىس شەكاراسىنا جوتكەلىپ جاتقانى تۋرالى دەرەكتەر بار.

AFP اقپاراتتىق اگەنتتىگىنە بەرگەن مالىمەتىندە اقش-تىڭ ۋكرايناداعى ەلشىلىگىنىڭ قىزمەتكەرى ەلشىلىكتەر جۇمىسى جالعاسا بەرەتىنىن ايتقان. بىلايشا ايتقاندا ۋكرايناداعى اقش ەلشىلىگى جابىلمايدى، ەلشىلىك قىزمەتكەرلەرىنىڭ جاقىندارى مەن وزگە امەريكالىقتارعا ەلدەن شىعىپ كەتۋ ەسكەرتىلگەن.

اق ءۇي بولسا رەسەي تارابىنان شابۋىل كەز-كەلگەن ۋاقىتتا بولۋى مۇمكىن ەكەنىن ايتقان.

The Qazaq Times