بۇگىن تاڭنان بەرى جاڭاوزەندە گاز باعانىسىنىڭ قىمباتتاۋىنا بايلانىستى جۇزدەگەن ادام اكىمدىك الدىنا نارازىلىققا شىقتى. نارازى توپ قالاي ورتالىعىنداعى جولدى جاۋىپ گاز باعاسىنىڭ تومەندەۋىن تالاپ ەتتى. بۇل تۋرالى ازاتتىق راديوسى جازدى.

بيلىكتەن گاز باعاسىنىڭ ارزانداتۋدى تالاپ ەتكەن جۇر تالاپتارى ورىندالماسا تارقامايتىنىن وبلىس بيلىگى ماسەلەنى شەشە الماسا ەنەرگەتيكا مينيسترلىگىنەن ادام كەلۋىن تالاپ ەتتى. گاز باعاسىنىڭ تومەندەىن تالاپ ەتكەندەردىڭ ىشىندە كولىك جۇرگىزۋشىلەر مەن بىرگە كولىگى جوق ادامداردا بار. جاڭاوزەننەن ازاتتىققا حابارلاسقان سەرىك باقتىبايۇلىنىڭ ايتۋىنشا 31 جەلتوقساندا 100 تەڭگەگە ساتىلعان گاز باعاسى 1 قاڭتاردا 120 تەڭگەگە كوتەرىلىپ كەتكەن.

ءوز ولكەلەرىنەن شىعىپ جاتقان گازدىڭ وزدەرىنە جەتپەگەنىنە نارازى قالا تۇرعىنىنىڭ ءبىرى: «گاز وزىمىزدەن شىعادى. ول جەردە كوبىمىزدىڭ اعايىن-تۋىسىمىز جۇمىس ىستەيدى. سولار ءوندىرىپ وتىرعان گازدىڭ بىزگە جەتپەۋى اقىلعا سىيمايدى. الدىمەن ءوزىمىزدى قامتاماسىز ەتپەي گازدى باسقا جاققا، رەسەيگە شىعارماسىن. گاز باعاسى ەلدىڭ جالاقىسىنا ساي بولسىن. باعاسىن 50 تەڭگەدەن اسىرماسىن. – دەيدى.

نارازى توپقا كەلگەن جاڭاوزەن قالاسى اكىمىنىڭ مىندەتىن ۋاقىتشا اتقارۋشى عالىم بايجانوۆ قالا اكىمى ماقسات يباعاروۆ قازىر كەزەكتى ەڭبەك دەمالىسىندا ەكەنىن ايتىپ. تالاپتارىن قاعازعا ءتۇسىرىپ بەرۋلەرىن، ونى جوعارى جاققا جەتكىزەتىنىنە ۋاعدا ەتتى. الايدا، جينالعاندار بۇعان دەيىن دە ونداي قاعازدى جىلدار بويى جازىپ، جولداپ كەلە جاتقانىن، ودان ەش ءونىم بولماعانىن ەندى تالاپتارى ورىندالمايىنشا تارامايتنىن ايتتى.

ازاتتىقتىڭ حابارلاۋىنشا 2 قاڭتار تاڭەرتەڭ باستالعان جاڭاوزەندەگى حالىق نارازىلىعى ءالى جالعاسىپ جاتىر. تۇستەن كەيىن ماڭعىستاۋ ءوڭىرىنىڭ وزگە اۋداندارىندا دا جۇرتشىلىق ولارعا قولداۋ بىلدىرگەن. قاراقيا اۋدانىنداعى جەتىباي كەنتى مەن قۇرىق اۋىلىندا، تۇپقاراعان اۋدانى اقشۇقىر اۋىلىندا تۇرعىندار جينالىپ، قازاقستان پرەزيدەنتى قاسىم-جومارت توقاەۆقا، وبلىس اكىمى نۇرلان نوعاەۆ پەن اۋدان اكىمدەرىنە ۆيدەوۇندەۋ جولدادى. وندا تۇرعىندارعا ساتىلاتىن سۇيىتىلعان گاز باعاسىن 50-60 تەڭگەدەن اسىرماۋدى تالاپ ەتۋدە.

سوڭعى حابارلاردا جاڭاوزەندە ينتەرنەت جىلدامدىعى باياۋلاپ، ءتىپتى بۇعاتتالعانى ايتىلىپ جاتىر.