ترامپ ۇكىمەتىنىڭ سولتۇستىك كورەيادان كەيىنگى نىساناسى يران

اقش مەملەكەتتىك حاتشىسى تيللەرسون مالىمدەمەسىندە، يرانمەن قول قويىلعان يادرولىق كەلىسىمدە وسىدان بۇرىنعى اقش-سولتۇستىك كورەيا اراسىنداعى ساياسي قاتەلىكتەر قايتالانۋى مۇمكىن دەگەندى ايتتى. بۇل پىكىرى ترامپ ۇكىمەتىنىڭ يران مەن سولتۇستىك كورەياعا دەگەن قاتاڭ ۇستانىمىن تولىق ايگىلەپ تۇر. بۇل تۋرالى تانىمال باسىلىم «The Wall Street Journal» حابارلايدى.

تيللەرسون سوزىندە بولاشاقتا اقش ۇكىمەتى يراننىڭ وڭىردەگى ارانداتۋشىلىعىنا جول بەرمەس ءۇشىن جاڭا سانكتسيا سالۋى مۇمكىن ەكەنىن دە ايتا كەتتى. قازىر اقش ۇكىمەتىنىڭ 2015 جىلعى يران يادرولىق كەلىسىمىنىڭ ءتيىمدى-تيىمسىزدىگىن قايتا قاراۋدا. سونىمەن بىرگە، سول.كورەيانى تەرروريزمدى قولداۋشى ەلدەر تىزىمىنە ەنگىزۋ ەنگىزبەۋ تۋرالى دا انىقتاۋ الىپ بارۋدى. ترامپ ۇكىمەتى سولتۇستىك كورەيادان كەيىن يران يادرولىق باعدارلاماسى تەجەلمەسە وندا الەمگە تاعى ءبىر ءىرى ساياسي جانجال الىپ كەلەدى دەپ وتىر.

اقش كونگرەسى يران يادرولىق كەلىسىمىنىڭ تولىقتاي كەمەلدىلىگىن راستاپ وتىر. دەسە دە، اقش مەملەكەتتىك حاتشىسىنىڭ ترامپ ۇكىمەتى يرانعا ۇستانعان ساياساتىنىڭ قاتاڭدىعىن قايتا-قايتا كورسەتۋى تۇسىنىكسىز. ەگەر، 2015 جىلعى كەلىسىمدى قايتا جاڭارتۋ تۋرالى ءسوز شىعاتىن بولسا، بەلگىلى اسكەري قۋاتقا جانە وڭىردەگى ساياسي سالماققا يە يران سىندى ەلدىڭ قابىلداي قويۋى ەكىتالاي. بۇل ورتا شىعىستاعى ۇلكەن ساياسي جانجالعا الىپ كەلەتىن ءىس ەكەنى بەلگىلى. ترامپ ۇكىمەتىنىڭ وكىلى رەتىندە تيللەرسوننىڭ بىلدىرگىسى كەلگەنى – سولتۇستىك كورەيا اۋىزدىقتالسا ودان كەيىنگى باستى نىسانا يران بولادى دەمەكشى.

The Qazaq Times