ەو قىتاي جوباسىنا قارسى كۇرەسۋ ءۇشىن 340 ملرد دوللار ءبولدى

قىتايدىڭ «ءبىر بەلدەۋ، ءبىر جول» دەپ اتالاتىن اۋقىمدى جوباسى ازيا، افريكا، ءۇندى-تىنىق مۇحيت ەلدەرىنەن تارتىپ ەۋروپالىق وداققا مۇشە ەلدەرگە دەيىن جەتىپ ۇلگىردى. قىتايدىڭ ىقپالىن ارتتىرۋعا تىكەلەي اسەر ەتەتىن بۇل جوباعا قارسى تۇرۋ ءۇشىن ەو تارابى 340 ميلليارد اقش دوللارىن ءبولىپ، گلوبالدىق ينۆەستيتسيا جوباسىن قۇراتىنىن مالىمدەدى.

جول، تەمىر جول، پورت سەكىلدى ينفراقۇرىلىمداردى جەتىلدىرۋگە ينۆەستيتسيا سالاتىن قىتايلىق جوبا باتىس بالقان تۇبەگىندەگى حورۆاتيا، گرەكيا سەكىلدى ەو مۇشەلەرىنىڭ ينفراقۇرىلىمدارىنا ارالاسىپ كەتتى. ايتالىق، پيرەيدەگى (گرەكيا) ماڭىزدى پورتتىڭ ۇشتەن ەكى بولىگىنە Cosco اتتى قىتايلىق كومپانيا يەلىك ەتسە، China Road and Bridge Corporationدەپ اتالاتىن قىتاي كومپانياسى حورۆاتياداعى اسا ماڭىزدى كوپىر قۇرىلىسىن سالىپ شىقتى.

وسى جاعدايلارعا بايلانىستى ەو تارابى قىتايدىڭ جاھاندىق جوباسىنا بالاما جوبا ازىرلەۋگە كىرىستى. قازىرشە Global Gateway اتالاتىن جوباعا بولىنەتىن قارجى كولەمى تۇراقتاندى،  ينفراقۇرىلىمدار مەن وزگە دە نىساندارعا گرانت نەگىزىندە ەمەس، كەپىلدىك نەمەسە نەسيە تۇرىندە بەرىلمەك. جوبانى تولىقتاي سەنىمدى برەندكە اينالدىرۋ ەو-نىڭ باستى ماقساتى بولعالى وتىر.

اتالمىش جوبامەن ەو دەموكراتيالىق مامىلەنى، جاھاندىق جىلىنۋعا قارسى كۇرەستى، سونداي-اق، جاھاندىق دەنساۋلىق ساقتاۋ سالاسىن دامىتۋدى، دامىپ كەلە جاتقان ەلدەردىڭ دامۋىن تۇراقتاندىرۋ سەكىلدى ماڭىزدى نىسانالاردى ورىنداي الامىز دەپ سانايدى.

قازىر ەۋروپا وداعى جوبانى جۇزەگە اسىراتىن «سەنىمدى سەرىكتەر» ىزدەستىرىپ جاتىر جانە كەمەلدى جۇيەسىن قۇرۋ ۇستىندە. جەمقورلىققا، پاراقورلىققا، قارجى جىلىستاتۋ سەكىلدى كولدەنەڭ سۋىق قولدارعا قولدى بولماس ءۇشىن قارجىنى يگەرۋدىڭ جۇيەسى كەمەل جانە تالابى دا قاتاڭ بولۋى مۇمكىن.

ەو ەلدەرىنەن كورى قىتاي ينۆەستيتسياسىن الۋ كوپتەگەن دامۋشى ەلدەرگە وڭاي، تارتىلعان ينۆەستييا، العان قارجى بويىنشا سوڭىنان ءتۇسىپ جاتقان سۇراعى از. الايدا، قارىز قايتپاعان جاعدايدا قىتاي ءوزى ينۆەستيتسيا سالعان ينفاقۇرىلىمعا يەلىك ەتەتىن كەلىسىمدەر كەزدەسەدى. وسى ارقىلى قىتاي كەيبىر ەلدەردى قارىزعا باتىردى دەپ ايىپتالۋدا.

The Qazaq Times