ارىستاعى جارىلىس: اپەللياتسيالىق سوت جازانى جەڭىلدەتتى

بيىل 26 شىلدەدە شىمكەنت قالاسىنداعى اسكەري بولىمدە تۇركىستان وبلىسى ارىس قالاسىنداعى اسكەري قويماداعى جارىلىسقا قاتىستى ايىپتالعان 16 ادامعا ۇكىم وقىلعان. سوت 16 ادامنىڭ 12-ىنە 4-10 جىل ارالىعىندا تۇرمە جازاسىن بەردى، 4-ءى شارتتى تۇردە سوتتالدى. شارتتى جازا مەرزىمى 4 پەن 7 جىل ارالىعى.

اپەللياتسيالىق سوت شەشىمىمەن قانات اقتانوۆ، ەرلان وماروۆ، اسات برالين، اس-ساللادين سارجانوۆ، باۋىرجان نيازوۆ، مارات سارسەنوۆ جانە كوپجان نۇرماحامبەتوۆ قىلمىستىڭ ەسكىرۋ مەرزىمىنە بايلانىستى قىلمىستىق جاۋاپكەرشىلىكتەن بوساتىلعان. باستاپقىدا ولارعا قىزمەتىنە سالعىرتتىق تانىتتى دەگەن ايىپ تاعىلعان.

سونىمەن بىرگە قۋانىش وسپانوۆ، رۋسلان وماروۆ، يۋري كاراكالچەۆ، مەيرامبەك ءجۇسىپوۆ پەن ادامات اياپبەرگەنوۆ قاماۋدان بوساتىلعان.

2019 جىلدىڭ 24 ماۋسىمىندا ارىستاعى اسكەري وق-ءدارى قويماسى جارىلىپ، سونىڭ سالدارىنان ءتورت ادام قازاعا ۇشىرادى. ولاردىڭ ەكەۋى – اسكەري، بىرەۋى – بەيبىت تۇرعىن، ال ءبىر بالا ەۆاكۋاتسيالاۋ كەزىندە جول اپاتىنان مەرت بولدى. وقيعا سالدارىنان الپىس مىڭنان استام ادام ءۇي-جايىن تاستاپ كەتۋگە ءماجبۇر بولدى. رەسمي مالىمەت بويىنشا، قالاداعى 7 527 ءۇي مەن كوپقاباتتى 103 تۇرعىن ءۇي زاقىمدانعان. پايدالانۋعا جارامسىز بولىپ قالعان 420 ءۇي مەن 3 كوپقاباتتى تۇرعىن ءۇي قۇلاتىلعان.