«تاليبانعا» قارسى كۇرەسەتىن ۇيىم اقش-تا رەسمي تىركەلدى

اۋعانستانداعى «تاليبان» بيلىگىنە قارسى قارۋلى ارەكەت ەتەتىن «ۇلتتىق قارسىلىق مايدانى» اتتى ۇيىم اقش-تا ءىس جۇرگىزۋ ءۇشىن رەسمي تىرەۋدەن ءوتتى.  اقش-تىڭ ادىلەت دەپارتامەنتى اتالعان ۇيىمدى رەسمي تىركەگەنىن لاۋازىمدى تۇلعالار راستادى.

اتالعان ۇيىمنىڭ سىرتقى بايلانىستار ءبولىمىنىڭ باسشىسى ءالي مايسام نازاري بۇل جاڭالىقتى جۇما كۇنى ءوزىنىڭ  Twitter پاراقشاسىنا جاريا ەتكەن ەدى. ول مالىمدەمەسىندە «ۇلتتىق قارسىلىق مايدانى» ءوز قىزمەتىن جاھاندىق دەڭگەيدە جۇزەگە اسىرا باستايتىنىن دا اتاپ وتكەن بولاتىن. الايدا، ول كەزدە امەريكالىق لاۋازىمدى تۇلعالار بۇل مالىمەتتى رەسمي راستاماعان-دى.

 ال، اقش مەملەكەتتىك دەپارتامەنتىنىڭ وكىلى اقپارات قۇرالدارىنا بۇل تۋرالى بەرگەن جاۋابىندا: «ءوزىن «ۇلتتىق قارسىلىق مايدانى» اتاعان ۇيىم اقش-تىڭ «شەتەلدىك اگەنتتىكتەردى تىركەۋ تۋرالى» زاڭنىڭ ءتيىستى تارماقتارىنا ساي 26 قازاندا تىركەۋدەن ءوتتى»، – دەپ راستادى.

تالىپتەر اۋعانستان بيلىگىن باسىپ العاننان كەيىن بۇرىنعى ۇكىمەتكە قىزمەت ەتكەندەرگە راقىمشىلىق جاريالاعان ەدى. الايدا، «تاليبان» ۇيىمىنىڭ مۇشەلەرى ءبارى بىردەي بۇرىنعى ۇكىمەت قىزمەتكەرلەرىن نىساناعا العان شابۋىلدار جاسادى دەپ ايىپتالىپ كەلەدى.

تالىپتەر بيلىككە كەلگەننەن كەيىن «ۇلتتىق قارسىلىق مايدانى» كابۋىلدان 100 شاقىرىمداي قاشىقتىقتاعى پانجشير شاتقالىندا ءوزىنىڭ بازاسىن قۇرعانىن جاريالاعان. «تاليبان» قارۋلى كۇشتەرى مەن ۇقم اراسىندا بىرەر اپتاعا جالعاسقان قارۋلى قاقتىعىستا بولعان ەدى. كەيىن تالىپتەر ۇقم جەتەكشىسى ەلدەن كەتىپ قالدى دەپ  مالىمدەدى جانە وزدەرىنە تاعىلعان ايىپتاردى تەرىستەپ شىقتى.

ايتا كەتەيىك، اۋعانستان ۇقم جاۋىنگەرلەرى نەگىزىنەن بۇرىنعى اۋعانستان قاۋىپسىزدىك كۇشتەرى مەن اقش دايىنداعان جەرگىلىكتى جاساقتاردىڭ قالدىق كۇشتەرىنەن قۇرالعان. قازىرگە دەيىن ولاردىڭ ناقتى سانى تۋرالى انىق مالىمەت جوق. ۇقم-ىن سولتۇستىك اليانستىڭ بۇرىنعى جەتەكشىسى احماد شاح ماسۋدتىڭ 32 جاستاعى ۇلى احماد ماسۋد باسقارادى.

The Qazaq Times