جاڭا ءتاج ءتارىزدى ۆيرۋستان (Covid-19) كوز جۇمعاندار سانى 5 ميلليون ادامعا جەتتى. بۇل تۋرالى اقش-تاعى دجونس حوپكينس ۋنيۆەرسيتەتىنىڭ كوروناۆيرۋستىق رەسۋرستىق ورتالىعى مالىمدەدى.

اتالعان ورتالىقتىڭ 1 قاراشادا تاراتقان مالىمەتىنە سايكەس، دۇنيە جۇزىندە جاڭا ءتاج ۆيرۋسىنان كوز جۇمعاندار سانى 5 ملن 425 ادامعا جەتكەن. نازار اۋدارارلىعى – كوز جۇمعان سوڭعى 1 ملن ادام سوڭعى 4 ايدا تىركەلگەن. بۇل ۆيرۋستان قازا بولعاندار سانى بارعان سايىن ارتىپ كەلە جاتقانىن كورسەتەدى.

بۇنداي كورسەتكىشتەرگە قاراماستان قاتاڭ كارانتيندىك شەكتەۋلەردەن شىعىپ جاتقان ەلدەر دە بار. ايتالىق، دۇيسەنبى كۇنى اۋستراليا (اۆستراليا) ءوز ازاماتتارى مەن ەلىندە تۇراقتى تۇراتىن شەتەلدىكتەرگە جول ءجۇرۋ شارتتارىن جەڭىلدەتتى. بۇدان كەيىن شەتەلدەن ورالعان ازاماتتارى ەكى اپتالىق كارانتينگە جاتقىزىلمايدى. سونداي-اق، شەتەلگە شىعۋ شارتى دا قالىپتى رەجيمگە اۋىستى.

1 قاراشادان باستاپ تايلاند تا ۆاكتسينا قابىلداعان تۋريستەردى ەلىنە كىرگىزۋگە جول اشتى. تۋريزمنەن مول تابىس تاۋىپ كەلگەن تايلاند كوروناۆيرۋس پاندەمياسى كەزىندە ۇلكەن ەكونوميكالىق شىعىنعا ۇشىراعان ەدى.

ال، بريتانيادا 12-15 جاس اراسىنداعى جاس جەتكىنشەكتەرگە ەكپە ەگۋ باستالىپ كەتتى. 1 قاراشانىڭ وزىندە بريتانياداعى 800-دەن استام مەكتەپتە مەديتسينا قىزمەتكەرلەرى جەتكىنشەكتەرگە ۆاكتسينا سالدى.

جوعارى دا اتالعان حوپكينس ۋنيۆەرسيتەتىنىڭ مالىمەتىنە ساي، الەمدە 7 ميللياردتان استام ۆاكتسينا دوزاسى ەگىلگەن. كەيبىر ەلدەردە ءالى دە ۆاكتسينا تاپشىلىعى ساقتالىپ كەلەدى، ال كەيبىر ەلدەر ەڭ تەز قارقىنمەن ۆاكتسينا جالپىلاستىرۋدا. قازىر ددسۇ ەكونوميكاسى ءالسىز ەلدەردەگى ۆاكتسينا تاپشىلىعىن ورتاق شەشۋ بويىنشا جۇمىس ىستەپ جاتىر.

The Qazaq Times