الماتى قالاسىندا پتر تالداۋىنان كوروناۆيرۋس انىقتالعاندار قايتا كوبەيدى

قازان ايىندا ەڭ كوپ سىرقات تىركەلگەن الماتىدا 6716 ادامنىڭ تالداۋىنان كوروناۆيرۋس انىقتالعان، تاعى 130 ادامعا كوروناۆيرۋس پنەۆمونياسى دياگنوزى قويىلعان. قازىر قالانىڭ 4 مىڭعا جۋىق تۇرعىنى ەمدەلىپ جاتىر. ءتورتىنشى تولقىننىڭ شارىقتاۋ كەزەڭىنە قاراعاندا بۇگىندە كولەمى ەكى ەسەگە قىسقارعان اۋرۋحانالارداعى توسەك-ورىنداردىڭ 39%-ىنا ناۋقاستار جاتقىزىلعان.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 19 قازاندا تىركەلگەن 312 ادامنىڭ 303-ءى سيمپتوم بەلگىلەرىمەن، تاعى 9-ى سيمپتومسىز. بۇل دۇيسەنبى كۇنگى جاعدايعا قاراعاندا 62 جاعدايعا كوپ. سونىمەن قوسا، سەيسەنبى كۇنى 127 ادام اۋرۋحاناعا جاتقىزىلعان.

جالپى قالادا سىيىمدىلىعى 3179 ورىن بولاتىن ينفەكتسيالىق ستاتسيونارلاردا 1255 ادام ەمدەلىپ جاتىر. ولاردىڭ اراسىندا 31 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 129 ناۋقاس جاتىر. 27 ادام ءوجج، 72 ناۋقاس ءينۆازيۆتى ەمەس ءوجج-ىمەن جانە 20 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 2694 ناۋقاس امبۋلاتورلىق دەڭگەيدە باقىلاۋعا الىنعان.

اپتا باسى دۇيسەنبىدە ءبىر ادام كوروناۆيرۋس پەن وعان ۇقساس پنەۆمونيادان قايتىس بولعان. قازان ايىندا 123 الماتىلىق وسى دەرتتەن كوز جۇمعان.

رەسمي دەرەككە قاراعاندا، الماتى قالاسىندا بيىل اقپاننان بەرى 981 مىڭ ادام ەكپەنىڭ العاشقى، ونىڭ ىشىندە 906 مىڭى تولىق دوزاسىن العان. ونىڭ 120 مىڭعا جۋىعى 60 جاستان اسقان ازاماتتار. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

ەپيدكارتادا بىرنەشە ايدان بەرى «قىزىل ايماقتا» تۇرعان الماتى قالاسىندا پاندەميا باستالعالى 183 مىڭداي ادام اۋىرعان، ونىڭ 6,8 مىڭى قازان ايىندا انىقتالىپ ۇلگەردى. قازىر رەسپۋبليكادا تىركەلەتىن كۇندەلىكتى ەسەپتىڭ كەمىندە 15-20%-ى الماتى قالاسىنا تيەسىلى بولىپ وتىر. ءۇش جارىم ايدان بەرى «قىزىل ايماقتان» شىعا الماي وتىرعان قالا اۋرۋشاڭدىق بويىنشا ءبىرىنشى قاتاردان تۇسپەي كەلەدى.

The Qazaq Times