رەسەي پرەزيدەنتى ۆلاديمير پۋتين قازاقستان اەس سالاتىن بولسا، رەسەي كومەكتەسۋگە ءازىر ەكەنىن، قازاقستاندىق مامانداردى دا وسى سالاعا باۋلۋعا دايىن ەكەنىن مالىمدەدى. بۇل جونىندە ول بۇگىن، 30 قىركۇيەكتە وتكەن XVII ايماقارالىق ىنتىماقتاستىق فورۋمىندا ايتتى.

"رەسەي ءبىزدىڭ ارىپتەستەرگە، قازاقستاندىقتارعا دا، اتوم ەلەكتر ستانتسياسىن سالىپ، پايدالانۋ بويىنشا كومەگىن ۇسىنادى. ماسەلە رەسپۋبليكادا رەسەيلىك ۇلگىدەگى اەس سالۋ جونىندە عانا ەمەس، تۇتاس سالانى قالىپتاستىرۋ جونىندە بولىپ وتىر. ونىڭ ىشىندە اتوم ەنەرگەتيكاسىمەن بايلانىستى كادرلاردى رەسەيلىك وقۋ ورىندارىندا وقىتۋ دا بار" دەدى ۆلاديمير پۋتين.

بۇعان دەيىن قىركۇيەكتىڭ باسىندا ۆلاديۆوستوكتا وتكەن شىعىس ەكونوميكا فورۋمىنىڭ پلەنارلىق وتىرىسىندا پرەزيدەنت قاسىم-جومارت توقاەۆ قازاقستانعا اتوم ەلەكتر ستانتسياسى قاجەت ەكەنىن ايتقان. توقاەۆ وعان دەيىن ءوز جولداۋىندا دا ەلگە اەس قاجەت ەكەنىنە توقتالعان. ول ۇكىمەتكە ء"بىر جىلدىڭ ىشىندە قاۋىپسىز اتوم ەنەرگەتيكاسىن دامىتۋدى زەردەلەۋدى" تاپسىرعان.

قازاقستان بيلىگى ەلدە اەس سالۋ باستاماسىن كەيىنگى جىلدارى ءجيى كوتەرىپ ءجۇر. بىراق قوعامدا بيلىكتى بۇل باستاماسىنا قارسىلار كوپ.

The Qazaq Times